يابوي عينك لاتدمع ولاتحني راسك حزنا علي، خلي راسك شامخ فوق مثل ما ربيتنا، الاردني ابد ما يحني راسه الا للسجود لرب العالمين.
يابوي انت علمتنا ان الاردني دوم شامخ، مرفوع الهامة، ما يهاب المنية، والاسود عمرها ما تهاب الجرذان، لانها اصلا ما تشوفها وهي تجري تحت رجليها.
يابوي لاتدمع عينك حزن، حقك تفرح، لاني وفيت بالعهد، وما اخلفت بالنذر، وفديت الوطن والدين والامة بروحي ودمي.
يابوي روحي فارقت جسدي، لكنها سكنت بجسد كل اردني حر، وكل اردني حر هو معاذ يابوي، وحقك تفخر واتقول : انا ابوه لمعاذ، انا ابوه لمعاذ الوفي بالعهد، شهيد الامة، عريس الاردن.
يابوي انا سطرت للعالم معاني الفدى، معاني الوفى، معاني التضحية والابى، يابوي صدقني النار ما مستني، ما مست كرامتي، ما مست كرامة الاردني. النار يمكن دغدغت جلدي بس روحي الاردنية الابية رفرفت بعليين السما، وشربت من سلسبيل المياه.
يابوي يمكن فارقتكم بجسدي والجسد دوم يبلى، لكن بامكانك تراني بعين كل جندي من جنود الوطن، وبعين كل اردني يهوى الوطن، يابوي يمكن فارقك ولد، لكنك كسبت الملايين اللي يحبوك ويتمنوا انهم ايكونوا الك ولد.
يابوي افخر وافرح بابنك مثال التربية وياأمي زغردي وافرحي ولاتحزني، ترى دموعك تحرقني اكثر من النار اللي حاولوا يحرقوني بيها، يا أمي الف معاذ فدوى دمعة من عيونك، يا أمي يكفيك اني استشهدت شامخ مش خاين واللا هارب، عندها حقك تبكي، يا أمي زغردي، يا أمي زغردي.
رائد شيكاخوا
