أخبار البلد - صالح عربيات
لغاية اليوم لاتزال إقامة حفل زفاف ابن رئيس وزراء سابق حديث الناس، لأنه غنّى فيه راغب علامة، وأقيم في أفخم فنادق البلد، وكان فيه خرفان محشية !!
بجوز كان لازم ابن خال الرئيس يمسك "طبلة" في السهرة ويقعد يغني: شن قليلة.. شن قليلة.. الله يعينه على هالليلة .. او بجوز كان لازم عملوا حمام عريس وغنوا فيه: شطبنا اسم العريس من دفتر العزوبية.. وسجلنا اسم العريس في الاحوال المدنية، ويوزعوا فيه كنافة أصابع مع قناني بيبسي .. او بجوز كان لازم خالات العريس غنن: طلي يا "…." من الشباك وزغردي.. قولي هظول إخواني وأهلي وعزوتي ، او بجوز كان لازم عملوا "صحجة" وقصدوا: بعيني شفتك بضبعة.. مع ابو "…" وربعه.. او بجوز كان لازم قعدوا للصبح يمرسوا جميد ويخبزوا شراك.. او بجوز كان لازم وهمه بطبخوا المناسف غنوا للرئيس: يا دولتك حنّا عزوتك.. جلايبك يوم المبيع.. او بجوز كان لازم الرئيس حجز باص للنسوان لما راحوا جابوا العروس.. او بجوز كان لازم عند دار أهل العروس قعدوا الشباب يغنوا: يا "…" ياذيب العيال.. زين البنات اوداعتك.. او بجوز كان لازم النسوان غنن اول ماطلعت العروس من دار أهلها: يخلف عليكوا وكثر الله خيركوا.. او بجوز كان لازم سيارة العروس تكون "مرسيدس بطة" .. او بجوز كان لازم العريس راح شهر العسل على حمامات ماعين.. او بجوز كان لازم اهل العروس طلعوا معها كل لوازم المطبخ.. او بجوز كان لازم ابو العريس أخذ زاوية وقعد يعد بالنقوط.. او بجوز كان لازم ام العروس عتبت على ام العريس ليش ماركبت معهم بسيارة العروس.. او بجوز كان لازم حجزوا ملك المجوز "ابو الليل" بدل راغب علامة.. او بجوز كان لازم سرقوا كهرباء العرس من عمود الشارع.. وذلك حتى نقتنع أن العرس من جيب والد العريس وليس من جيب المواطن !!
سنبقى هكذا.. كل ما مسؤول زوج ولد بدنا نقول المطرب من مصاري "البوتاس" .. والخروف المحشي من مصاري "الاراضي" .. والإضاءة من مصاري الباص السريع.. وشهر العسل على حساب الضمان.. والورد على حساب الميناء.. .. والزفة من كوميشن العطاءات !!
سنبقى هكذا.. نتهم، ، ونهاجم، ونعترض، ونغتال، ولن يصدق أحد بان العرس قد يكون من تعب العريس… او على حساب أهل العروس.. او حتى من تحويشة والد العريس !!
سنبقى هكذا.. حتى تقول هيئة مكافحة الفساد كلمة الفصل في كل الملفات التي نعرفها.. بغير ذلك مشروع عرس ابن أي مسؤول هو من الان مشروع اغتيال وليس مشروع أسرة !!
