اخبار البلد - بسام العريان 

كنت حابب خبرك أنو جسر اللوزية فجروه

ودروب الهوی انقطعت .. لأنو في دواليب مشتعلة

وماعاد عم ينتظرونا عمفرق دارينا .. هلأ عم ينطرونا عالحاجز اللي قبله.

و طريق النحـــل ماعاد حدا عم يسترجي يمشي عليه خوفاً من شي عبوة ناسفة.. أو شي قنبلة صوتية

والبوسطة يلي كانت تنقلنا من ضيعة حملايا لضيعة تنورين عم تروح فاضية .. لأنو العالم ميتة رعبة من طرقات السفر

وصرنا بدل ما نسمع صوت المهابيج .. عم نسمع صوت أربيجيه وهاون ورصاص

والسيارة مش عم تمشي، لأنو ماضل معنا حق بنزين وجرة الغاز بعشر دنانير

والقهوة اللي عالمفرق سكرّت.. و صرفت الشغّيلة

وجوزها لأم سليمان ما طلع عم ياكل رمان بالحقلة .. طلع مخطوف.. وام سليمان باعت اللي فوقها واللي تحتها لحتى تطالعو

و بعد ما ضاع شادي ، استشهد وليد وأحمد وعلي وقصي وسيف وعبد العزيز وأصيل وإيلاف وشادية وهديل وهبة

وما عاد فيكي تقطفي ولا زهرة حمراء.. لأنو الزهر اصفَرّ من خجله قدام دموع الأمهات

فقررت يا فيروز آخد هالناي وأغني ..

بلكي لهـالربيع العربي يا فيروز .... ترجعي تغني .......

وتصحي الضمير العربي ويرجع الحلم العربي

( مع تقديرنا لكلمات الشاعر الراحل محمود درويش والذي أحببت أن تكون روحه الطاهرة معنا في إنتصار غزة هذا اليوم التاريخي والغير مسبوق هنيئا لفلسطين ورئيسها محمود عباس هنيئا لغزة هنيئا لخالد مشعل " ابو الوليد " هنيئا لهنية الفارس المغوار هنيئا لنا جميعا بيوم النصر " وانتصرت غزة 21/11/2012 " والحمد لله ونعم للوحدة الوطنية ولا للإنقسام بعد اليوم