اخبار البلد_ مثله كمثل الحراكات الشعبية في دول الربيع العربي، يقوم الحراك الاردني بإضفاء صور طريفة على مطالبه بالتغيير والإصلاح، مقدما بذلك نوع من الفكاهة والسخرية.
وتعبر قصيدة ساخرة عن مطالب الحراك الشعبي من خلال ابيات شعرية تحاكي أغاني تراثية شعبية قديمة، لشاعر مجهول من الحراك اطلق على نفسه أسم "أبو منقل التنخيلي".
نص القصيدة:
تلولحي يا دالية..على الشلة الهاملة
يما الشعب انزم انزم..وما حد داري ولا مهتم
والاصلاح راح راح.. ضاع القفل والمفتاح
هون واربط عالبوتاس.....باعوها وقالوا افلاس
وياللي فوق ياللي فوق ...اسمع للشعب المخنوق
ودرج ياغزالي.. باعوكي يا بلادي..
ودرج نونة نونة ......عالبلد المديونة
يما الشعب انزم انزم..وما حدا داري ولا مهتم
هون واربط عالفوسفات.. تا تطلع الدولارات
ما تنسى الاتصالات..راحت بشوية ليرات
درج يا عزالي...باعوكي يا بلادي
يما الشعب انزم انزم..وما حدا داري ولا مهتم
ليلتين الحنة الحنة.. والحرامي ما هو منا
يا ويل اللي يعادينا ...عالدوار يلاقينا...
لا منخل ولا منقل.. والفساد اللي طول
يا ويل اللي نحاربه.. الشعب يقطع شاربه
هون واربط عالمصفاة..والمية والكهربا
كله انباع ..كله انباع..قولولي مين البياع
والتحول والتخطيط.. سرقهم هاظ العبيط
وبدنا باقي الحرمية.. مطالبنا الشعبية
وياللي فوق ياللي فوق ...اسمع للشعب المخنوق
درج يا غزالي.. نهبوكي يا بلادي
تلولحي يا دالية.. على الشلة الهاملة
يما الشعب انزم انزم.. وما حدا داري ولا مهتم
والحراك والحراك.. واحنا يا فاسد وراك
بالحسيني وبالنخيل.. شرفا ما بدهم تنخيل
اهتف اهتف يا حراك ... والشعب يهتف وراك
والشعب بده بده.. ارض ابوه وجده
بدنا اصلاح وتغير....ما بدنا وعد وتصوير
وبدنا نرجع المسروق.. خلي هالحرامي يزوق
وياللي فوق ياللي فوق ...اسمع للشعب المخنوق
درج يا غزالي .......نهبوكي يا بلادي
تلولحي يا دالية ....على الشلة الهاملة
يما الشعب انزم انزم ....وما حدا داري ولامهتم.
