أخبار البلد
لو طبق القانون العادل على هؤلاء المتخلفين وأخذوا الى المخفر وحرموا من العرس واندعس عا راس أكبر شنب فيهم بقوة القانون لأصبح كل المجتمع محترمين ... اللهم ارزقنا مسؤولين يحقّون الحق في حرب الفساد (د. أمجد قورشه)
اليوم كنت طالع على الشغل زي كل يوم (مع انو اليوم الجمعه بس ما علينا)
شوفت فاردت عرس، طبعا وكالمعتاد والمتعارف عليه حسب العادات والتقاليد كانت مسكره الشارع (كل المسارب)
وماشيين عسرعة ١٠ بين دوار الداخليه ودوار المدينه فإجت من ورانا سيارة اسعاف مشغله اللواح وزامور الاسعاف
(الذي على ما يبدوا لا يعني شيء في الاردن الا عند قليل من الناس)
طبعا ضلت سيارة الاسعاف تعاني لوصلت لمنطقه قريبه من سيارة العرووس (مع انو نص الفارده طالعين من الشبابيك
وشايفين اللواح والسياره بس اكيد مش مهم لأنو العريس ابنهم والزلمه الي بلإسعاف ما بعرفوا)
وبعد معاناه دامت حوالي ال ٥ دقايق طلع واحد مش مع الفارده بس شكلو كان مستعجل وصار بدو يفتح طريق
لسيارة الاسعاف (جونقر) فصار في نقار بينو وبين سيارة من سيارات الفارده صاروا يسكروا على بعض
ويسبسبوا على بعض ويضربو بريكات (طبعا على سرعة ٥ ) يعني صارو همه الي مسكرين على سيارة الاسعاف ومش الفارده
واستمر هادا الحكي مدة ٨ دقائق يعني لعند نفق الصحافه وبعدين بعد ما زهقو سبسبه ودقاره كل واحد فيهم
دعس عالصاجه وضلهم رايحين وصار الشارع فاضي (والله انو احنا شعب بيفهمممم)
بس مش هون المشكلة، المشكله انو سيارة الاسعاف موديل قديم وماتور مكنسة او غسالة
وصارت يا دوب قادره تطلع الطلوع (يعني ازا بتسمو الطريق من نفق الصحافه للجامعه طلوع)
يعني انا كنت ماشي ٥٠ وسابقها………..
وبالنهاية الف مبروك للعروسين...........
والله يرحم الي توفى بسبب تناحة هذا الشعب المحترم……
نستنتج من هذه القصه......
يا هم لالي
(منقول عن صفحة د. قورشة على الفيس بوك)
