بصراحة مش قادرة أسكــت. صار لإبن إبنـي أكثــر من أربع سنين، ... شو أربع سنين...؟ أكثر أكثر متخرج محاسبة، يعني دبلوم مش أربع سنين عقّـــدْنا !، و مش متوفق بشغلة مستديمة يا خالتي.

غيّــر الشغل خمس مرات، ومش محوّش و لا قرش لجيزتُه !.

بقدّم طلبات، و في كل مرة بيتصلوا معاه جماعة، و لما بشوفوه بيعجبهم كثير، مهو مرتب زي أبوه عدم المؤاخذه، و بيتعيّن ب 250 ليرة بالشهر.

دايما يا خالتي بلاقــــي شُغُــل بشــهر 10 من السنة.

حكالي : " و الله يا ستي أنا حكايتي حكاية. بقعد مع مدير الشركة وبيحكيلي إنه المحاسب تركهم وطلع عالسعودية أو عالإمارات، وبدنا تزبّط الدفاتر لآخر السنة، و إذا شُفتك كويس، بزيدك زيادة محرزة و عمرك ما حلمت فيها، و نو بروبلم no problem يا عمي !

بشتغل يا ستي ليل نهار و برتّب الحسابات لعند آخر السنة و بتطلع أحلى من الفُل.

بعد أول شهر من السنة، و عند الزيادة يا ستي بناديني المدير، بكون شاري ساعة حقها اربع تالاف ليره، و بيحكيلي صار عندك أكثر من تنبيه، و دايما منرفز، بصراحة هاظا الكلام ما بيمشي معانا، و الله معك، و لو تشوفي زيادة المراسلين و السواقين ... عشر ليرات و بطلوع الروح !

يعني يا ستي بكون إشتغلت أربع تُشهر بألف ليرة، يعني بالشهر 83 ليرة و ثلاثين قرش بالعدد، و بعديها بستــنّى لشهر عشره !

إذا طرحنا المواصلات و الأكل يا ستي، بكون إشتغلت ببلاش".

طب يا خالتي بصير هاظا الحكي ؟ إلناس بطّلت تخاف ربها ؟، طب وين المسؤولين يحقــقوا بهاي المصيبة، بدنا نجوّز الولد لأنه صار كبير كثير !، و الله يستر يا خالتي !!!

 shafiqtdweik@yahoo.com