اخبار البلد 

يا وطن !!!

قلت ياوطن بدي أسألك عن الشاطر وابو شطيره

وعن ابوببيونه وبرنيطه وسيجار كوبي وحصيره

وعن الوزير اللي صارت امواله جراره واطيانه كثيره

وعن التاجر اللي اجانا بغفلة ليل بلا اهل وعشيره

واعطيناه الامان وصار المفوض السامي لعصابة منيره

وعن الحراث اللي ترك محراثه وباع ثوره وبعيره

وصرت اله ياوطن لعبة فنه وحساب جاري وميراث وخميره

وعن الصعلوك اللي صار مستشار والكل بوطنا يستشيره

وصارت حكايته عندنا ازمة وطن وهو يقرر مصيره

وعن اللي صار السايس للخصخصه وسكرتير الوزيره

ويقدم النا النصايح عن الاقتصاد وتصوراته وتصاويره

وبدي اسالك كمان ياوطن عن العدل وحراسه ونواطيره

وكيف اللص فيك صار صاحب راي وحجه وبصيره

ويعلن على ترابنا ومؤسساتنا ومصانعنا حربه ونفيره

وكيف سمحت له ياوطن اصير سيدي وانا اجيره

أه ياوطن أه حقا صارت حكايتك مهزله وقصة ومثيره

بنيناك وحفظناك لمن كانت ارضك تراب وعفيره

وصار الوضيع فيك يطلب منا نكون جحوشه وحميره

وينادي بين الخلايق انا فارس البلقا وابن النسب والعشيره