أي واحد بيقدر ينتقد و يشكي – مقال ساخر
 
بقلم: شفيق الدويك
 
كنت زمان أقعد قدام التلفزيون و أنا منهنهه من شغل البيت و أحكي لإبني : " يمّا إقرالي الترجمة للمسلسل الإنجليزي (بيتون بليس Peyton Place) شكله حلو كثير هالمسلسل بس مش فاهمه عليهم شو بيحكوا، ما أنا مدخلتش مدرسه زي عمتك. بدي أتسلى يما، مهو أبوك نايم و بشخور و فش منو فايده بإشي. أي قميصُه إللي بيلبسُه بيعرفش يزررُه".
 
و هاي الأيام إبن إبني بيفتح عالإنترنت قُدّامي و بيقرالي مقالات مكتوبه عن الوظع بالبلد و لوين وصلت الدنيا، مهو راتب تقاعد المرحوم تبعنا قليل يا خالتي و أنا بطقطق شوية، يعني ببيع ملابس للجيران مثل ما حكيتلك زمان و مستوره و الحمد لله، بس بدي أطمّن حالي و أعرف إللي بصير، عقلاتي هيك بيحكولي. الله يجيب إللي فيه الخير يا خالتي.
 
إللي شايفتلك إياه يا خالتي الكل نازل ، و من بعيد، صف حكي و نقد بدون ما واحد يفش غُلنا ويعطي وصفه تعالج هالمشاكل الموجوده عن حق و حقيق. طب يا خالتي ما كُلنا بتهمنا مصلحة الوطن، مهو إلنا و إحنا إلُـــه.
 
و الله يا خالتي ما في أسهل من إنك تصُف حكي عن لهموم و المشاكل إللي بحسّوا فيها البشر، مهي مبينه حتى للولد لصغير، سلامة قيمتك، و بدل ما يظيّع معظم الكتاب وقتهم و جهدهم في الوصف بس، و يقولوا عندنا بطاله و فقر و تظخم و عجز موازنة و ارتفاع مديونية البلد و نمو مش مرتفع و تشديد من لبنوك على الناس إللي محتاجه تقترظ و عُنف إجتماعي ،يوصفوا و يعطوا العلاج إذا هم قد حالهم و مهتمين بمصلحة البلد و الناس أو يسكتوا، يعني إللي عنده أفكار و خبرات في مجال محدد يعطينا إياها هالجواهر، مش ننشر غسيلنا قدام الأغراب،  مهو إللي بياكل العصي مش زي إللي بيعدها يا خالتي . بصراحة كثير من الكتاب حرقوا بنها يعني قهوتها على رأي إم عجاج، و مش من مصلحتنا و مصلحة البلد كُثر البرم عالفاظي.
 
أي مهي مشاكل الحكومة، الله يعينها، كثير كثيره و مش ناقصها تظل الناس تسم بدنها كل يوم. أي و الله لو طالع بإيدها لتحل المشاكل كلها و تخلص من حكي الناس و تحليلات حتى بياعين الإشارات و الشحّادين.
 
يا خالتي الموظوع مش بسيط عالحكومه. أي و الخالقني الناس ما هي عارفة تدبّر أمور بيتها لصغير مش أمور دولة و محداش عاجبُه العجب.
 
أي يعني إحنا هسه صرنا كاملين و بنفظي البال ؟ أي عليّ الجيره من جيرة ربي فينا أغلاط بتعبي محيط وأكثر من أغلاط الحكومة بألف مره .
 
إللي بدو يزعل مني يا خالتي يزعل. أنا بدي أقول كلمة حق لأني ست كبيرة و متابعة و بعرف حاجات كثير من الناس مش عارفتها و مر عليّ أمور كثيرة في الدنيا : " إحمدوا ربكم يا ناس، إتحمّلوا و تكيّفوا، مهي شِــــدّه على كل الأمم و بتزول عنّـــا بإذن الله بهمة المخلصين العاملين  ببيت الشعر " و تعظم في عين الصغير صغارها و تصغر في عين العظيم العظائم". بصراحة بدنا ناس تشتغل مش تنظّـــر !
 
و الله إحنا لسه بألف خير بالنسبة لأحوال غيرنا من الأمم، و أعطوا الحكومة شوية مبررات، و إللي عنده كلام حلو يحكيه مهو ما بأثّر على إللي عندهم ظغط و سكري مثل حكايتي، لأنه الكلام الحلو إللي  بقصده لازم يكون مفيد يعني بدون سكر sugar free لأنه السكر سم أبيظ هو و الملح ! و الله يستر يا خالتي ".