أخبار البلد -   رغيف

الكاتب الصحفي زياد البطاينه

خجلت ان اقف بالطابور ...او ازاحم الناس على باب المخبز... وفضلت ان اتحدى الحكومه فالحكومه قصدت من هذاا ان تذلهم عندما حولت تفكيرهم عن قضاياهم ومشاكلهم وارائهم الى البطون وجرة الغاز وتنكه الكاز وكانت الدمعه قد فرت من عيني غصبا وانا ارى جموع الشعب تقف بالطابور فانثنيت وانا لاانحني الا لله
والمهم اكثر شعبنا مصاب بالسكري ومسامح الحكومه بالرغيف
ومع هذا تسائلت

هل حقا بستاهل هالشعب تمرغ فيه الحكومة الارض وتسفه التراب وتبيعه العباية والجلباب وطول عمره يحب التراب .
بعد ان رفعت الحكومه دعمها عن رغيغ الخبز ورفعت الضريبه ىعالبنزين لتضمن حقها سلفا حقا انا مااستغربت بس سالت حالي شوالجديد والشعب صار عالحديدة وليش الحكومة بتعرف شوهو الرغيف ومن وين بيجي الرغيف ولمين بروح الرغيف وقيمه الرغيف... ليش اولاد الحكومة بوكلو رغيف الفقرا العويص والمحروق والمكبتل يمكن بوكلو خبز بس بسموه فرنسي ومرقوق ومابحبوه لانه بسمنهم وبصير بدهم ريجيم اعوذ بالله من الشيطان الرجيم
واحنا بمثل سنهم ماكنا نعرف العيا والحكيم... وبنقلع السن ان وجعنا بخيط وبتحداكو اولاد هون وهون وحمله التلفون النقال يعرفوا.... شو الغربال والشربال والمارج والثمنية والنصيةوالربعية ومين بعرف لوح الدراس والبيدر ومين بعرف الحصادة ومواعيد الحصيده وطعام الحصادين ولقمه الحراث واللي بعرف له مني رغيف خبز طابون وحصاوي من فرن زبلته جدتي بالليل والصبح قامت باسم الله تخبز العجين المخمر.... جدتي طول الليال مانامت ولا جدي... والصبح جابت شويه جله وشويه عيدان ووزتهم تحت الفرن...وقالت باسم الله ومدت ايدها جوه الفرن وطلعت الرغيف المقمر... تعال ياجديدتي كل هالرغيف دوك مقمر.. وغمسته بالزيت الكفاري... كل ياجده قبل مااروح للحصادين بستنوا ...وقلت يارحمن حد بتذكر؟ ولا بس اولاد القرى اللي رضيوا بالمقسوم وسعدوا بشوفه القمر والنجوم يارب ديمها عيشة بس البطر ماخلاها عيشة غير كل شي غير نفوسنا وغير حالنا وصرنا نقول مشان الله ياحكومة لاترفعوا سعر الرغيف واي رغيف وشو جاب لجاب وهم اللي كانوا يطلبوا منا الرغيف ويشتروا منا القمح وييجو يتفرجو كيف بنحرث وبنبذر وكيف تنمو زرعه القمح وبتصير خضرا وبتكبر وبتصير صفرا مثل الذهب ....وكيف بمتد الها المنجل وكيف الايادي المخربشة والزنود السمر بتجمع وكيف بتنقلها الحمير والبغال للبيدر واه ياهالبيدر قديش تمرمغت عليك انا والحمام والطيور منكل نوع ونوع وفغشت زر البندوره وحبات التين وقديش فكرت حالي فارس الفرسان وانا عالحمار راكب ومدلي اجري بدرس القمح فيك واه يحب القمح كيف بتتجمع وكيف بتتحمل بالشوالات وكيف بتتخزن اه ياكوارة جدي اه يابياع العنبر اه ياايد جدتي بتندس بالبيدر تمنحه البركه واه واه الحكومة كانت تشتري منا مش احنا نشتري منها الماشية كانت ماتاكل غير البذرة القوية والشعير والقصل والتبن ونسوان الحي يلحقوها حتى يلموا الجله ويطبعوها عالحيطان تاتنشف اه واه عجدتي ماكانت تترك حبه بعد ماينتهي لبيدر تلملمها مع الحمام والعصافير وتظل تقول كلوا كلوا هاي رزقتكوا من الله قسمها النا والكو بتذكر كانوا يقولوروح على صما بتلاقي الخبز مرمى وبتذكركانوا يقولو بغطس بالقمح ماحد بشوفه من طوله وبذكر الدريهمه والجلتون والحارس بلاحقنا من هون لهو ن بتذكر سراج الحصادين والنايمين عالبيدر والندى اللي بغسلهم وفراشهم كله راح وصرنا نقول للحكومة لاترفعوا سعر الرغيف ميله تميلنا والبين يسطنا وين راحت هالايام ووين صرت وصرنا حتى اليوم نقول لاترفعوا سعر الرغيف لانه رغيف الخبز مش نفط ولاجرة غاز ولاشقه عيش كريم رغيف الخبز رغيف العرقانين الشقيانين اللي البلد انبنت على اكتافهم المسلوخة واحذروا ثورة الفقرا اصحاب الرغيف الجوع كافر والبعض بغامر مش هامه الناس ولا عذابهم وجوعهم المهم يقولوا فلان نجح بتطبيق سياسه ويريتها سياسه ناجحة اللي بتمص الشعب وتحرم الاطفال لفه زعتر وزيت والدغا والعفا ولسانهم ماهدي وهو يدعي زي جسمهم اللي مادفي والله كبير مابنسى عبده كريم بطرح بارغيف الخبز غصب عن اللي رفع سعره وتصوروا بعض المخابز باوزع ببلاش خبزها عالغلابى والطفرانين والسوري والوافد بوخذ الخبز مجانا باتلكوبون ومخصص اله اربع مسارب وبضحك وبقول احنا الحمد لله واصلنا ببلاش على مين راحت عاغلابى الاردنيين ملعون الرغيف اللي بركع اصحاب الكرم والهمه والضمير ...
pressziad@yahoo.com