شو السيرة ياجماعة انتوا بعدكوا مصممين على سولافة 15 تموز, وشو بدكم من تموز ..؟ ماهو تموز مولع خلقة وانتوا عايزين تولعوها كمان زيادة . ياجماعة ارحموا عزيز قوم زل , وارحموا الشارع الاردني , وارحموا الناس . رمضان جاي ع الطريق والناس قاعدة بتدور على الاكل دوارة وكيف بدهم يمضوا رمضان على خير وانتوا دايرين بدكوا تصبوا الزيت ع النار...!! تموز 15 سيأتي وسيذهب ويأتي 16 تموز وبعدين شو بدكم وشو المشكلة اللي انتوا بدكوا اياها , خلصونا ياجماعة الوقت مش لصالحنا ومش لصالح بلدنا ومش لصالح النسوان اللي صارن من الآن بخططن بدهن يطلعن على الشوارع لويش ياحجات بدكن تطلعن ..؟ بدكن اصلاح ..؟ ماهو الاصلاح كله بايديكن , والاقتصاد كمان وحل المشاكل كله متعلق فيكوا وانتوا الحل..بدكوا حكومة رح نعطيكوا بس لاتطلعوا بالشوارع وتعملونا فضيحة جديدة ياجماعةالخير خلي العقل منكوا وخلوا هالشهر الفضيل يمضي على خير وبلاش دوواين فاضية , اللي بدكواياه رح يصير بس فكونا من تموز وحزيران, مانتوا شفتوه وشايفين شو سوى اذار ونيسان وايار بالدول جيرانا وشو اللي صاير فيهم مش ملاقين الخبز يوكلوه ومش ملاقين راحة بال يوم واحد ومش عارفين شو يعملوا صابهم اكتئاب ولحقهم ضيم من ورا ال15 و12 و10 اذار وايلول ونيسان وغيره .. طيب تعالوا ليش ماتعملوا حملة رمضانية في كافة انحاء المملكة لجمع تبرعات ولعمل افطار جماعي للناس اللي مش ملاقية اكل توكل مش احسن من هالاعتصامات الكذابة والدوواين الفاضية اللي دايرين وراها.. تعالوا نعمل اعتصامات لجعل الحكومة والمسؤولين بالبلد اصحاب الاموال المرتفعة لعمل افطارات جماعية في مختلف محافظات الملكة وغصبن عنهم عارفين ليش لانه اموالهم منهوبة من اموال الشعب والشعب احق فيها منهم انا بقول حطوا عقولكوا بروسكم وفكروا كويس قبل مايفوت الفوت ونرجع نتحسر ونقول ياريت ماكان اللي كان.. خلونا بعيدين عن المشاكل لانه البلد مش ناقصها مشاكل اكثر من اللي فيها واحنا اهل النخوة والحمية واللي فينا مكفينا وزيادة ... انا متأكد بانه رئيس الحكومة رح يطلع عليكوا ويقول غير الكلام اللي قاله قبل دوار الداخلية وانا متأكد كمان رح يطلع عليكوا اذا مش اليوم بكرة بمفاجئة جديدة تجعل من الشارع الاردني يبتهج فرحا ويريح من اعصابكم شوي حتى نقدر نتجاوز هاي المعضلة واللي اطلقتوا عليها 15 تموز.. أملنا كبير فيكم ياقوم وياسادة ويامثقفين البلد ويااحزاب ان تخففوا من الجو المشحون وان لاتضيعوا الناس معاكم على أشياء لاتفيد البلد والأردنيين الا أزمات و كوارث جديدة تضاف الى الكوارث والأزمات ... التي تشهدها المنطقة العربية بشكل عام.... نتمنى على قوات الأمن والدرك والجيش ان يحموا المعتصمين ويوزعوا عليهم الماء والحلوى اكراما حتى ينتهي هذا اليوم 15 تموز على خير واحنا متفقين وواعين ومتفهمين لكل كبيرة وصغيرة وان لانجعل الامور تنحرف عن مسارها او يعكر صفوها متسلق او حاقد او جبان... والله الموفق