مصارينا حلال !
بقلم: شفيق الدويك
= شو أخباري يا خالتي ؟
أنا يا خالتي دايما بحُط إيدي على قلبي. دايما خايفه !
بدنا نسجل إبن إبني بالمِدرسة للسنة الجاي، الله يستر عينُه يا خالتي من ولاد المدرسة، هظول شياطين مش ولاد و ما حدا مربّيهِم، أي يوم العزومه بيقعدوا عالكراسي قبل لكبار و بيرظوش يقعدوا حدا، و ما بسلموا عحدا يا خالتي و أهاليهم بقولوا صغار !
لمّا إشترينا العام زيتون "أخظر"، كان كله دود يا خالتي، كنت بدي أبعث منهم لبنتي بالسعودية. الله و كيلك رميتهم لغنمات الجيران !
بدي أعاود أصلّح الثلاجة هاليومين، الله يستر ما يطلب لِمْصَلّح قطع إلها زي كل مرّة و أحُط إللي فوقي و إللي تحتي. و الله الأغراظ إللي كانوا فيها رميناها كلها يم. بصراحه بشك في المصلح إنُه غشيم يمّا.
أنا سرحانه بجرس هالباب إللي ركبناه جديد، الله يستر ما يِنِحرِق أو يِعمل واحد من لسلاك شورت مثل ما صار عند جارتي أم كمال، مهو نفس الكهربجي، الله يقطع الصين و حاجاتها، الله و كيلك تقول شاري كراكيب يا خالتي !
= كيف عمي ، إبنك، يا خالتي؟
عمك صار عنده البركه مدير جديد دايما مكشّر و وجهه مش سمح بالمره و ما بيظحك للرغيف السخن. الله يستر ما يفنّش عمك، هظول الشركات مثل شباط ما عليهم رباط، و كل سنتين بجيبوا مدير جديد. بدنا نسدد تالي أقساط البيت و نكمل تعليم لِوْلاد.
كل يوم يا خالتي بطلعلنا مصروف جديد، و فش يا خالتي مهو الراتب على حطة إيدك. سيارة إبني خربانِهْ صارلها اسبوع، الله يستر ما يكون الماتور مفرهل. فش بنك راظي يعطينا قرش لأنه البيت مرهون و عمك المحترم كفلان جارنا، من وراي، و راتبه محول للبنك إللي بيتعامل معاها جارنا. عيشه مكركبه، بدي أطق و أموت من عمك !
و فوق كل هاظا، طرشنا الدار يا خالتي العام، و كلها قبّعـــت !
= و كيف جارتك ام حجازي ؟
خزّان الميه إللي جابوه للعِرسان، طِلع مخزوق و ما بيلتحِم... بتعرفلكش إبن حلال يِلِحْمُهْ إلهُم، ما معاهم يجيبوا غيرُه !
أخوها ما حدا من إلدكاترة عارف "لَمَرَظُه"، صار شايف أربع دكاترِه. بتعرفلكش واحد فهمان و إبن حلال ؟؟؟ ظهره بُوجْعُهْ و ما بنام من وجعه.
= شو مغيره ترتيب البيت يا خالتي؟
إلنجّار يا خالتي ما عِرِف يركب خزانتي، و بدل ما يحط عشر براغي للدرفة حط أربعة، و كل الدرف وِقعت ... وحده مِنهن وقعت عرجلي و صرت أعرج من يومها. بتفكر الناس إنه عندي خلع ولاده !!!.
لمين أشكي همّي يا خالتي ؟؟؟ أروح عالمخفر ؟؟؟ "بالك بِعَوْظونـــا" ؟؟؟ لوين أروح أنا و الناس لوين و الله مصارينا حلال ؟؟؟
