و الله يا خالتي معظمهم أونطجيه
بقلم: شفيق الدويك
حكيت لإبن إبني شوفلي يا ستي بالكومبيوتر شو يعني أونطجي ؟
دخل و شاف معناها من موقع جوجل ، و طلع معناها: " كلمة تركية الأصل و تطلق على من لا ينطق بالحق ".
سألني إبن إبني يا خالتي: " ليش يا ستي بدّك تعرفي معناها ؟ "
حكيتلُه: " أبوك يا ستي صارلُه يومين مش نايم خايفه عصحتُه، و سيجاره ورا سيجاره، وفش كلمه طالعه من فتحة ثمّــــه غير : " و الله يمّـــا كل الإداره أونطجيه، و خادعين المدير العام " !
عملتلُه كاسة شاي، و حكيتلُـــه: " يمّــــا في رب شايف و عارف و بحاسب الجميع، يُمهل و ما بيهمل، يعني يمّـــا إللي أخذ ترقيتك و زيادتك و جمّدك من سنتين رايح يفلت يمّـــا ؟ لا و الله ، و الله يمّــــا يا حبيبي بغمظة عين ما بشوف حالُه إلاّ بحفرة طولها مترين و عرظها أقل من متر. الحرام مش رايح ينفعهم بآخرتهم يمّا " !
بدي أسألك يا خالتي سؤال: " عدم المؤاخذه، فش كمرات تشوف إللي بيشتغل و إللي ما بيشتغل، و يحاسبوا هالمساكين لمعثرين ما دام المدير العام بصدّق الأونطجيه بطريقه ما تغظب الخالق ؟ بلاش كمرات. فش طريقه ثانية ما دام قلوب الناس قاسية عبعظها ؟ ، مهمو يمّـــا كل راعي مسؤول عن رعيته"
أي بدون يمين يا خالتي، لو حطوني مسؤوله بمشغل خياطه، لأدير بالي عالجميع كإنهم ولادي، ما أنا يا خالتي بخاف أطُب ساكته بأي لحظه !!!
