فتح خزانته،انزل علب التوفي الفارغة من الرف العلوي ، قلّب الأوراق التي بداخلها ،أخذ كرت التأمين الصحي ثم توجّه الى اقرب مستشفى ..

هناك في مدخل الطوارىء ، اقترب من موظفة الاستقبال منهكاً متعرقاً فوجدها تنسق لاعتصام مع زملائها...مشى وحيداً باتجاه سرير فارغ ورمى جثته المتساقطة عليه، بعد دقائق حضر طبيب الطوارىء..

الطبيب: ها حجي سلامات!

ابو يحيى بنفس مقطوع: الله يسلمك.

الطبيب: من شو بتشكي؟

ابو يحيى: قول من شو ما بشكيَ!.

الطبيب : في وجع بصدرك!.

ابو يحيى: نار طالعة منه.

الطبيب: راسك بوجعك؟

ابو يحيى: بحسه طقّ.

الطبيب: قلبك ؟

ابو يحيى: مليان!

الطبيب: لسانك؟

ابو يحيى: مربوط.

الطبيب: معك ضغط؟

ابو يحيى: بدي افلّ من جلدي.

الطبيب: نَفَسَك؟؟

ابو يحيى: مخنوق!

الطبيب: نظرك؟

ابو يحيى: عندي عين فيها طول والثانية قصر..يوم افتحهن مع بعض بشوفش اشي.

الطبيب: رجليك؟

ابو يحيى: مش شايلاتني!

الطبيب: اديك؟

ابو يحيى: مقطّعات.

الطبيب:ظهرك؟

ابو يحيى: ماليش ظهر

الطبيب: سمعك كويس!

ابو يحيى: المشكلة انه كويس!.

طبيب الطوارىء: بصراحة حجّي لحد هسع مش عارف احدّد شو بوجعك بالزبط؟؟؟

ابو يحيى: آآآآخ..وطني ب»يوجعني» يا دكتور..وما بعرف اذا كرت التأمين بيغطي هالوجع ولا لأ!!!!.