خاص لـ أخبار البلد

كتب احد اعضاء ما يسمى بالحراك الشباب الاردني رسالة الى رئيس الوزراء عون الخصاونة يطرح خلالها حملة من الاسئلة التي تحمل انتقادا ساخرا من موقف الحكومة تجاه ما جوبه به اعتصام الدوار الرابع .
وتاليا نص الرسالة كما وردت على موقع الفيس بوك :


بتخيلك دولتك واقف على شباك في دار رئاسة الوزرا "مفروض انها دار الشعب "شباك حسب المواصفات و المقاييس "sea view”

كيف المنظر دولتك و انت واقف و بتمج على السيجارة و بتضحك نص ضحكة "ضحكة صفرا" قبل اول صفيرة ؟؟.

كيف المنظر دولتك كيف بالله ماهو زي لاهاي ؟ ....عدل و عدالة ... امن و استقرار...انصاف للميت جوع ...صح نفس الشي؟؟.

كيف المنظر دولتك و الشباب بتنكتل يا ترى سمعت صوت الصياح ولا القزاز بهالدار ما بيوصل صوت ؟؟

كيف المنظر دولتك و اربع مساكين درك ملتمة على الوحش المفتول العضلات ضخم الجثة نهاد زهير شفت كيف شدو شعره عجبتك هاي صح ؟

كيف المنظر دولتك و الشباب بتهتف للحرية و الخبز و العدالة الاجتماعية ... ترى دولتك ما جابوا سيرتك ... اسألني ليش ... انا بدي اقولك ليش لانه الشباب مثقفة و واعية و عارفة انك لا بتهش ولا بتنش ...شايف دولتك لو ظليت بلاهاي كان ظل لكلمتك سطر بس هون ما ظل سطر لكلمتك ... و صدقني دولتك انا مثل اخوك الصغير و بعرف انت لا كسبت لا هاي ولا هاي .

دولتك و بعد كل هذا بدك الشباب يطولوك... ترى الشباب صوتها عليها مش ببلاش و بتستثمر صوتها صح يااااا ريت تعرف كيف تستثمر زيهم .

كيف المنظر دولتك و انت تحت التكييف ... كيف كان حامي زيادة ... حقك كان يومها شوب , بس ترى مش من الشمس من قهر الشباب على احرار الطفيلة من قهر الشباب على بلدهم ... دولتك لا تعصب شباب و دمهم فاير مش بايدهم مهو وطنهم مسلوب .

قولي يا دولتك مالك ساكت ... كيف المنظر و الدرك العجايز بضربوا الشياب الي مش عجايز ... دولتك نمت شكلك... اصحى ترى الطوفان جاي و رح ياخد الطالح و الفاسد ... قوم الحق حالك...

دولتك يا دولتك ... اقولك ... قوم غسل وجهك بالرحمن ... و طسه بشوية مي لأنه ترى الشباب الي جوه ماهم سهلين ترى و الله غير يسووا ثورة جوا السجن ... لا بيكنوا و لا بيهدوا صدقني ...هذوول حراك شبابي

دولتك زمان النصيحة كانت بجمل ...هسا ببلاش قوم طلعهم و ارجع ارتاح لانه بشرفي لا الموقر 1 و لا الموقر 2 بوسعهم هذول احرار عمالقة ... قوم دولتك قوم ... هات ايدك ...

يا دولتك مش نزلت لدار ابو حمدان ... لو نزلت للشباب شو خسرت ... قوم دولتك طلعهم قبل ما يقلبوا الموقر 1 و يسووا ثورة قادمة من الموقر .
اخوك الخالص
احمد النجداوي