اخبار البلد - رصد - كتبت الشابة الأردنية ميس الزبن، رسالة مؤثرة مرفقة بصورة تخرجها من الجامعة بعد سنوات من التعب والتحدي بسبب فقدانها شعرها بالكامل ورموشها وشعر حواجبها.
ميس كانت في كُل سنة دراسية تمضي تعيش على أمل ظهور شعرها من جديد لتبدأ حياتها من جديد بطاقة وأمل كبيران، حتى وصلت السنوات الجامعية.
وققرت ميس دراسة تخصص "علم النفس” بعد الحالة الصعبة التي كانت تعيشها مع نفسها كل يوم، وهي لا تزال على أمل ظهور شعرها من جديد حتى تستعد للاحتفال بتخرجها بشعر جديد وشكل جديد، إلا أنها استمرت على الحال ذاته.
وأكدت أن تخصص "علم النفس” كان بـ مثابة رسالة سماوية لها لـ تخرج من حالتها التي تعيشها تكون أقوى من قبل، حيث كشفت من خلال كلامها كيف ساعدها تخصصها الجامعي بـ تجاوز كُل ما عاشته وتقبل ذاتها في الأخير”.
ودعمها عدد كبير من رواد مواقع التواصل الاجتماعي في الأردن، مُعبرين عن فرحهم بقوتها وإصرارها.
و كتبت ميس عبر صفحتها في فيسبوك: "باللحظة اللي قررت فيها اتصوّر عشان التخرج؛ قررت اتصوّر هالصورة، صورة تبيّن شكلي الحقيقي ، شكلي اللي رافقني نص حياتي الدراسية وحتى اكتر من النص”.
و تابعت: "تساقط شعري بالصف السادس، السابع حكيت رح يطلع وما طلع واجى التامن والتاسع والعاشر وانا شعري متساقط، تخرجت من العاشر وما عندي لا شعر ولا رموش أو حواجب حكيت الحمدلله ومعلش لسّا معي سنتين للتوجيهي بكون شعري ورموشي وحواجبي موجودين.. والواقع انه خلصت التوجيهي ولسّا ما طلعوا .. بكذب اذا حكيت كان الوضع عادي، لأنه الحقيقة ما كان عادي ابدًا وبكيت كتير وكانت وحدة من الاسباب اللي منعتني اعمل حفلة بوقتها شعري، ما بدي احط باروكة وبنفس الوقت ما بدي اكون هيك …”.
وأضافت ميس "المهم، كمّلت وحكيت في كمان اربع سنين جامعة وان شاء الله اكيد بكون شعري طلع وبعمل احلى تسريحة واحلى حفلة وبحط مسكارا وهلأ هيني تخرجت من الجامعة بس بدون ما احط مسكارا ولا حتى اعمل تسريحة بشعري او اسشوره زي ما حكيت، الفترة الماضية ما كنت تمام وبكيت كتير وزعلت؛ بكيت لأنه كان نفسي يكون الي صورة بالشكل اللي بتمناه وبستناه من سنين ،، كنت ببكي وبنفس الوقت بحكي ما اتفهني شو هالموضوع اللي ببكي عليه مالك ميس! ما كنت قادرة امنع حالي انه ازعل او ابكي ..”
وأنهت رسالتها: "بس الفرق انه هلأ انا خلصت وتخرجت وانا راضية بعكس أي مرحلة مريت فيها، انا راضية بشكلي حتى لو بدون رموش لو بدون شعر لو بدون حواجب، انا ممتنة جدًا للحظة اللي قررت فيها اكتب علم النفس بطلب القبول الموحّد وممتنة للحظة اللي طلعلي فيها التخصص رغم العيّاط اللي صار يومها ما كنت بعرف انه هالدرجة رح يفيدني التخصص، الحمدلله يارب فعلًا كل شي بصير معنا لحكمة ولخير؛ علم النفس غيّر كتير شغلات فيي، دخلت الجامعة ميس وتخرجت ميس تانية أنضج واوعى وأقوى وعندها رضا وتقبل لذاتها، حتى لو بكيت بس أنا راضية وراضية كتير ♥️”.
