كيف ينعكس الرأي العام الداخلي والخارجي على الناس ومدى تأثيره عند استضافة ناس ( سذج ) بالقنوات الفضائيه / التلفزيون ؟ ... وازيدك بيت من الشعر وسائل الاعلام بشكل عام ايضا عندما تستضيف او تمنح فرصه لشخص ( ساذج ) ان يفصل ويقيس ويلبس الناس على كيف افكارو وتحليلاته الساذجه ؟ .. شو رأيكم ؟ ...
يعني بتطلع ناس ما بعرف منين بجيبوهم القنوات وقال المذيع بنفخ بالزلمه وكاميرات ومكياج واضرب واطرح وبتقول يلا السلامه خلينا انشوف شو بطلع من امر هذا الزلمه ... اشوي الله وكيلك بتكتشف انه عباره عن ( طبل فارغ ) بشرق وبغرب وافكارو ساذجه زي سواليف العجايز لا بتقدم ولا بتأخر .. اي يلعن اخت هالشغله .. ذبحتو الذوق العام .. شوشتو الناس .. دمرتو العالم .. غسلتو مخاخ البشر بافكار باليه .. شو جابو هذا للتلفزيون .. شو طلعوا على التلفزيون .. مين قرابتوا اللي بالتلفزيون ... شو هذا بسوي بالتلفزيون .. اي يلعن التلفزيون ... واللي اخترع التلفزيون .. والتلفون والميكرفون والسيفون والبنطلون والبلون .. امنيح هيك ..
هذا الزلمه او ضيوف الحلقه بأخرو الناس بأفكارهم خمسميه وخمسين الف سنه لورا .. اي شو هاذ ؟ ... الاعلام بتقدم ولا بتأخر... افكارهم ضيقه .. مغلقه .. مجامل .. كذاب ... البحث عن الشعبيه .. الانسلاخ عن الذات .. بوق ... جاهل ... غير مثقف ... برضو امنيح هيك .. اي طفح الكيل ... انا ومني وعلي بميز الغث من السمن .. طيب وغيري ؟ ... بستقبل المعلومات كما هي بدون تحليل او تمييز .. ثقافات الناس متعدده ... في ناس جوفاء .. فارغه .. بتعبي حالها معلومات حتى اتسد فجوة الفراغ الثقافي والمعرفي عندها من هذه الندوات وتنظير الحاضرين والضيوف .... بغض النظر عن مدى رقي المعلومه او صحتها او كذبها او تخويثها ...
وللأسف تصبح فيما بعد ( قناعات ) .. يا حبيبي .. وتعال قطبها ... والله راسو والف سيف ما (حيد) او تراجع عن معلومه لزقت براسو او مخو ولو كانت خاطئه .. قال شو .. يا زلمه مهو قال فلان وطلع على التلفزيون شو انت افهم منو .. اي لو ما بفهم ما جابو على التلفزيون ... حل عنا يا ... حليت عنكم ... انتو حريين ... خليكو .. على عماكم .. على جهلكم ... وانا مالي.
كل واحد بفكر حالو انشتاين .. او جان جاك روسو ... والادهى والامر قال اخر لحظات من البرنامج قال بتعدى الوقت وهو بحكي .. يعني الزلمه بدو يعطيك انطباع انو مثقف ومحشي معلومات وانو وقت البرنامج ما بكفي لافكارو النيره .. قصدي المدمره الجاهله ... المذيع بسأل واحد من الضيوف الكرام سؤال ... بروح بمط بالسولافه وبجتهد وبستنتج وبحلل بلحظتها ... وبشمط حالو وبروح يبعبش بالتاريخ حتى يطلع معلومه تدعم كلامو .. تاريخ ايش يابا والناس نايمه .. شو بدنا بالتاريخ هسه .. الزلمه بسألك سؤال واضح مثلا .. بقولك كيف ترى نهاية الازمه السوريه ؟ ... بقولوا والله حلقه واحده ما بتكفي للجواب على هذا السؤال .. بدنا عشر حلقات .. يا زلمه جاوب على قد السؤال وخلصنا.. شو رأيك اتقيم اقامه دائمه بالتلفزيون ... جيبولوا فرشه ومخده خلي ينام بالتلفزيون ... جاوب وخلصنا ... نقط هالجوهره .. يعني على اعتبار انو الزلمه رأيو مهم و ( اوباما ) بحضر هذا اللقاء ... اي المتصلين من برا البرنامج حتى يسألو الضيوف مش عارفيم اسماء الضيوف بتلاقي ببلش ايقول تعليقا على كلام والله ما اني عارف شو اسمو.. ( هذا اللي على يمينك / هذا اللي على شمالك / هذاك ابو بدله زرقا / هذا اللي مربي لحيتو / هذاك اللي لابس نظاره / هذا اللي شالح كندرتو / هذا اللي جنبك بتثاوب .. ) وهذا ان دل على شيء دل على انو ضيوف الحلقه مجهولون للعالم وللناس ورغم ان اسمائهم مكتوبه اول اللقاء واسفل الشاشه الا انو الناس ما حفظت اسمائهم ولا راح تحفظ .. وبتلاقي الضيوق والمذيع والناس المتصله يتدنى مستوى الحوار والافكار لديهم الى اقصى درجه .. المداخله ركيكه ضعيفه والضيف ركيك ضعيف والمذيع ركيك ضعيف ثقيل دم غلس جاهل ... لا .. والادهى والامر بتلاقي كمان المذيع بجر الضيف حتى يحكي حكي هو المذيع بدو اياه يحكيه .. شو هي مؤامره ؟ ... شو بتتخوثو على الناس يعني .. ما الامور واضحه ومبينه ... الله يقطع الجهل بس .. الله يقطعوا قطيعه .
بحشو بهالندوات حشي .. بدورو تدوير على مواضيع تافه يحكو فيها .... ناهيك عن تكرار المواضيع طبعا .. حتى المواضيع الجاده والخطيره بجيبوا ناس طبه لا تفقه شيئا وبتخبص انفعالين عصبيين جهله .. ( أحد الامثله ).. والأن لقاء مع فلان اصابه ضنك العيش فلجأ الى ( تلقيط الصراصير واصطيادها ) ثم يقوم بتغليفها وطحنها وعمل منها سماد كيماوي ليبيعها لأعاله اطفاله ال (حداش ) ... وبتروح حلقه كامله قابله للتمديد والتجديد على هذا الموضوع الذي لا يهم الناس .. اذا هذا ببيع صراصير اي هو بألف نعمه في غيرو قاعد بوكل الصراصير من ضنك الحياه.. هو لحالو يعاني من ضنك الحياه .. ما كل العالم يعاني من ضنك الحياه .. والموضوع مش مستاهل حلقه او ندوه .. لا وبجيب المذيع مع الضيف ( خصم ) او ند يفند اقوالو عشان الندوه تحمى وتجذب المشاهد .. ما بعرفوا ان ثلاث ارباع الناس مطنشه ندوتهم وحوارهم وحالقيللهم على الناشف .
وموضوع الحلقه بين ( الضيفين صاحب القضيه والخصم) بتم بالسناريو التالي ...
- هسه انت بدك تقنعني انو انت بتصيد وبتلقط صراصير يا زلمه .. وين هاي صارت .. مش لهالدرجه .
- اي اقسم بالله يا رجل اني بلقط صراصير .. وهي ورقه والله خليه يسلط الكاميرا عليها .. شايفها وخلي المشاهدين يشوفوها .. شايفين هاي ترخيص من جمعية الرفق بالحيوان بالسماح لي باصطياد وتلقيط الصراصير لغايات منفعه عائليه لأعاله اسرتي .
- يا زلمه ما كل واحد بجيب هذا الترخيص .. هي شغله .. ليش انت مثلا بتحاول تقنع الناس انو الخير انقطع بهالدنيا .. كل كلامك تلفيق ومش صحيح .. والدليل تعال شوف الصراصير اللي ببيتي .. مليانه .. ان دل على شيء دل على انو حضرتك بتلقطش صراصير .. يا اما انت مدسوس او مخرب او بدك اتشوش على العالم وتعطي انطباع للناس وللعالم انو احنا وصلنا للحضيض .
- يا زلمه هذا اللي طلع معك .. انا مخرب يا مدسوس .. يا زلمه بقولك والله ما اني لاقي اكل .. صرت القط صراصير .. ..وهاي كمان مش مصدقيني فيها الله اكبر .
- سينا منك يا شيخ .. طيب ليش ما اتروح تشتغل بمصنع او مصلحه مش احسلك ؟
- يا زلمه هو انا لاقي .. واذا لاقيت ما بيعطوني راتب زي الناس .. هاي بتوفي معي احسن .
- وطييب ليش حضرتك جاي تفضح حالك على القنوات الفضائيه والتلفزيون ... اشتغل ولقط رزقك ويا دار ما دخل شر .
- هم جماعة التلفزيون / القناه الفضائيه اجو لعندي وقالو بدنا نستضيفك ببرنامجنا .. في ندوه او حوار بدنا اياك اتكون معنا حتى انفرجي الناس والمسؤولين الى اين وصل وضع المواطن .
- يعني الشغله عملية هدم .. وليس عملية بناء .. يعني تصييد بالماء العكر وانت الضحيه .. يعني بتدخل السولافه من باب تشويه صورة المجتمع وتعالو يا ناس شوفو .. عملية احراج .. لكن هذا الحكي ما بقدم ولا بأخر بكيان اي دوله قائمه .. ما كل العالم بعاني .. وكل العالم فيه مثل هذه الظواهر .. وفي لسه ظواهر ابلى واشد من ظاهرتك .. شو جبتو اشي جديد يعني .. ولا بس بدكم تحشو فقرات بهالتلفزيون والقناه وبس .
- انت بتحكي هيك لانك غني .. لو وضعك زيي كان حضرتك مش بتلقط صراصير .. كان بتلاقيك بتلقط ابو بريص .
- شوف هاالحكي ... اسمعوا دا .. وبطلوا دا .. ايه يا عم .. انت حتنئ.
- (انؤ ) ايه يا راجل .. اصحى لنفسك .. ما اللي ايدو بالنار مش زي اللي ايدو بالميه .
- انت حتبرئلي بعينيك .. اسمع يا جدع .. انا مش نئصك .. انا اصلا مفروس منك من اول ما أئعدنا .
يتدخل المذيع ويحجز بينهم وبمسك ( كرتونه الصراصير ) وبرميها من الشباك وبنهي اللقاء ... وبعدها كل العاملين بالمحطه الفضائيه او التلفزيون بمسكوا ( علب البف باف ) وببلشو يرشوا عن جنب وطرف .
ملاحظه : أخ ..أخ بس.. لو بعرف لغه فرنسيه .. كان عمري بحياتي ما حطيت على قناه فضائيه عربيه .. أخ بس ... وفرصه من مره .. في عندي تلفزيون للبيع ... ومعاه هديه صغيره .. ( دبدوب صغير ) بنتي بدهاش اياه . يلا لا حدا حوش .
والسلام عليكم
برهان جازيه
Burhan_jazi@yahoo.com