خطر على بالي بأوقات كثيره وخاصة وأنا بوضع بحاجه به الى مساعده ونجده أن أنادي ( وامعتصماه ) ... لكن خفت كل المعتصمين بشتى الدول يصيروا عندي ... ما الكل معتصم .. خفت يفكروا أني بنادي عليهم ... ويفهموا قصدي غلط ... يا حبيبي لو ناديت او قلت ( وامعتصماه ) اول ما بيجي لعندي جماعة ميدان التحرير ( مليونيه ) هاي مش أي كلام ..وقيس على هيك كل جماعه معتصمه .. اشي عشان رواتب .. اشي عشان خدمات ... اشي عشان اصلاح بشتى انواعه .. يا حبيبي هذول كلهم راح يتجمعوا عند باب بيتي .. وراح يقولولي شو يا حج ؟ .. خير .. انت ناديت علينا أشي .. هم راح يفكروا اني ناديت عليهم مش من باب اني استنجد .. راح يفكروا اني بدي البي مطالبهم .. وهون راح يصير اشكاليه ويمكن ( نتكامش مع بعض ) مليونيه مقابل شخص الا وهو أنا .... وهذول شو أسوي فيهم اذا اتكوموا كلهم عندي .. هذول الجماعه وكل المعتصمين اجمالا يبحثون عن مطالب .. يعني بدهم مين يقف لجانبهم .. فمستحيل يجوا لعندي ويساعدوني وينقذوني من الوضع اللي أنا فيه .. فتراجعت عن هذه الكلمه التي لم يعد تفهم كما فهم معناها سابقا بالحادثه المشهوره لأمرأه مسلمه وهي في أسر الروم عندما استنجدت ... اليوم الكل معتصم .. اذا مش بالشارع بالبيت .. اذا مش بالبيت الواحد مع نفسو صار معتصم ..... قلت سيبك يا ولد من هذه الكلمه وشفلك كلمه ثانيه .... فجربنا ..
1- وا...زوجتاه ... مش معي .. بتابع مسلسل ( البرغوث ) ...يلا السلامه .. راحتلها سنه لحكايه .
2- وا ...جاراه ... فكرني كشفتو وهو قاعد بسرق مي من خزاني .. اتخبى ورا الخزانات .
3- وا .. إبناه ... مش فاضيلي ...قاعد بلعب ( بفرد الخرز ) خزق عيون البسس ... وامياوااااه ..
4- وا ... كهربا ... أجوني جماعة جباية الفواتير .
5- وا .. مياه ... أجو جماعة المي فكو الساعه .
6- وا .. أخويا ... خير انشا الله .. اسمعتك بتنادي علي .. كنو صار معاك عشر ليرات بدك اتسد الدين اللي عليك.
7- وا .. أختيا ... امنيح اللي اسمعنا صوتك .. عندك ( جوزي ) مجنني ومنشف ريقي.
8- وا .. أباه .... صغره تصغرك .. كبرناك وسوناك زلمه .. وبتنادي علي ليش؟ ... جيل أخر زمن .
9- وا .. أماه ... ماتت من زمان وشبعت موت .. على مين بتنادي .. هبل اللي يهبلك .
10- وا ..دكنجيا ... بطلنا انداين .. حل عنا يا.
11- وا .. مستشفيا .... جبلنا تحويله من مركز صحي بالأول .. وبعدين بنشوف شو قصتك .
12- وا.. تكسيا ... شغل العداد قبل ما يشغل (لفلشر) .
13- وا .. ناسا ... مش مستعدين يتركوا دورهم على طابور الخبز وطابور السرفيس عشان سواد عيوني .
14- وا .. عالما ... فورا صرح ( بان كي مون ) بكلمته المشهوره ( أشعر بالقلق ) جراء الاوضاع السائره او الدائره مع هذا الشخص المستغيث ... بتشعر في شو ؟ .. اه .. قلتلي .. بالقلق ... الناس ذبحت بعض وراحت دول وتفجرت الاوضاع بالعالم وما ظل حدا عايش وهو بقولك ( اشعر بالقلق ) فش حادثه بتصير بالعالم الا اول تصريح الو ( اشعر بالقلق ) وبنام عليها ثلاث الى خمس سنوات بتكون الناس ماتت والدول ادمرت والعالم انخرب بيتوا ... وبعدها بصرح ( لقد كان قلقي بمحلو ) .. والله انا قلقان على هذا الزلمه من كثر ما بقلق ... رجاءا .. ما حدا يحكي مع بان كي مون .. هذا صاحبي .. يسعدلي طلتوا ما احلاها .. انت شوف عيونو بس .. ابدا .. سبحان الخالق .

وبعد هذه المقدمه .. نخرج من الموضوع بسلاسه متناهيه مهملا الحبكه ومن ثم الولوج نحو بؤرة الضائقه والحرمان من جديد . لنعاود الكره نستنجد بكلمه لعل هناك من يستجيب للعون .. ما فهمت اشي من أخر جمله .

ملاحظه : أشعر بالقلق الشديد على نفسي وعلى غيري من هبات الزمان ...على أية حال ما لقيت كلمه استنجد فيها سوى ( يا رب العالمين ) فهو نعم المولى ونعم النصير .. والشكوى لغير الله مذله .

والسلام عليكم
Burhan_jazi@yahoo.com