رسالة الى فيروز الأغنية التي تنسى دائما أن تكبر..
والتي تجعل الصحراء اصغر..
وتجعل القمر أكبر..
كنت حابب خبرك أنو جسر اللوزية فجروه.
ودروب الهوی انقطعت .. لأنو في دواليب مشتعلة
وماعاد عم ينتظرونا عمفرق دارينا .. هلق عم ينطرونا عالحاجز اللي قبله.
و طريق النحـــل ماعاد حدا عم يسترجي يمشي عليه خوفاً من شي عبوة ناسفة.. أو شي قنبلة صوتية.

والبوسطة يلي كانت تنقلنا من ضيعة حملايا لضيعة تنورين عم تروح فاضية .. لأنو العالم ميتة رعبة من طرقات السفر.
وصرنا بدل ما نسمع صوت المهابيج .. عم نسمع صوت أربيجيه وهاون ورصاص.

والسيارة مش عم تمشي، لأنو ماضل معنا حق بنزين.
والقهوة اللي عالمفرق سكرّت.. و صرفت الشغّيلة.
وجوزها لأم سليمان ما طلع عم ياكل رمان بالحقلة .. طلع مخطوف.. وام سليمان باعت اللي فوقها واللي تحتها لحتى تطلعو.

و بعد ما ضاع شادي ما عاد فيكي تقطفي ولا زهرة حمراء.. لأنو الزهر اصفَرّ من خجله قدام دموع الأمهات المصريات والشاميات والعراقيات والفلسطينيات .

تعالي وهاتي هالناي وغني .. بلكي لهالربيع العربي يا فيروز ترجعي تغني وتصحي الضمير العربي ويرجع الحلم العربي ..