عِـــدِمْ عـقــلُهْ، ماسك هالمرايه، و قرّبت عينيه تِنِحْوِلْ، و أنا خايفِهْ عليه يا خالتي يِجيــه لُـطُـــفْ مـن ورا حـلاقـة راسُهْ !
حكيتلُه: " يمّـــا هذا الحلاق إعتبرك زبون طياري، يعني ما رايح ترجع تِحلق عنده، و شلفَــقَـكْ شَلفـقه، كَرْوَتَـكْ كَرْوَتِهْ. الله يكسر إيده الشيطان خــلاّك عِجْـبِهْ !
أنا يا خالتي شايفتلك كل المحلات و غير المحلات بتعامل الناس على إنها زباين طياري. لو في قانون يوقف الناس عند حدها كان ما بصير إللي بصير.طب إبني لو زاحت إيد الحلاق شحطه مش كان يمكن يشوهه، ويظرب العصب السابع تبعه !
لا ذمه و لا ظمير. الخبز عجين، العمارات الله يستر لقُدّام شوي، يعني أكم سنه، الطلاب الله يعـــوّظ، الفلافل و القهوة محطوط معاها خبز ناشف على ذمة الناس يا خالتي أنا ما شُفت. إللي بصلحوا السيارات بخربوها، و نفسك تاكل لُقمه من السوق مثل الناس. شو صاير عند هالناس ؟ انا داري ؟؟؟؟؟
يا خالتي قول ربنا بيستر. بس في ترباية ولادنا إنا نعتبرهم زبون طياري، لا كثير هيك.
إذا إجيت تسلم عالصغير ما بيرظى، تقول شايف غوله، و إذا حطينا السُفره بيقعدوا محل لكبار، وإمّاياتهم موافقين عشان يعملوا مشكله، و في المدارس و الشوارع طوشات و صياح و رمي علب العصير وغير العصير في الشوارع، غير إللي تاركين اولادهم للشغالات تربيهم. طب شو هالتربايه إللي بتكون متروكه لشغاله مش داخله مدرسه في بلدها !
بديش أطوّل بالكلام يا خالتي بلاش أزعِل حدا غير اللي زعلوا !!!!
.....
