الكاتب : برهان جازي

يا أخي في حدا مستقصد بيتي .. شو السبب ما بعرف .. كل ما نطلع مشوار ( العيله ) بنرجع على البيت بنلاقي واحد حاطط ( عود/حديده /خشبه ) بزرفيل الباب وبنقعد ساعه واحنا انحاول انطلع المحشور جوا الزرفيل .. لما ننجح بعد محاولات عديده ومرات ما بننجح وبنكسر الزرفيل .. والله بهدله .. هي عملة اولاد الجيران ولاد الحاره ما بعرف .. يعني سولافة ولد صغير ولا كبير مش عارفين .. ناهيك عن كومة حجار باب البيت شغل تطبيش .. حاولت اكتشف الجاني ما طلع بأيدي .. وجدت اقرب وسيله هو اني اركب كاميرا مراقبه من النوع الرخيص لكنها تفي بالغرض .. وعممت هذا الامر على العماره الي انا ساكن فيها .. والله جابت نتيجه .. وبطل واحد يسترجي يقرب باب البيت ان كان كبير او صغير وانتهينا من المشكله ..
وبعد مرور شهر ونص رجعت المشكله تقريبا من جديد .. والكاميرا يا أخي مش مسجله أي اشي . مش مسجله مين بقرب باب البيت وبحط ( عود / حديده / خشبه ) بزرفيل الباب .. شو هو جني ولا عفريت ولا في طريقه الكترونيه بتشوش او بتعطل الكاميرا مع انو الكاميرا بتكون مسجله كل حركه بس ما في بني ادم بطلع فيها .. منين بيجي (العود /الحديده / الخشبه ) اللي جوا الزرفيل ؟ .. شكيت بالزرفيل قلت يمكن انا شريتو وهو فيه ( عيدان / حدايد /خشب ) فكيتو كلو ما في اشي .. طيب بتفاعل مع الهواء الخارجي وفورا بشكل ( عود / خشبه / حديده ) منو لحالو جوا الزرفيل .. استنتاج حقير وتحليل وضيع وتفكير متخلف .. وبعدين مع هالشغله ..
رحت بحثت بالانترنت عن وسيله تكشفلي الجاني .. او ممن يعبث بمقدرات بيتي .. لم اجد الا كلمة ( باتريوت ) .. ( جوجل ) فهمني غلط .. كل ما اعمل ( search ) بروح بروح وغيب وبرجع بقولي ( باتريوت ) .. برجع بعدل الصيغه وبفهموا المشكله بروح بدور بدور وبرجع يعطيني كلمة ( باتريوت ) .. يا سيدي باتريوت باتريوت خلينا انشوف .. يا حبيبي .. هذا الو كاتلوك وعده خاصه فيه يعني والله ما اني عارف كيف بدي اركبو ؟ .. ووين اركبو ؟ .
طيب فرضنا ركبتو .. واجا ابن حلال ولعب بزفيل بيتي او رمى حجر على باب البيت .. فورا الباتريوت بدو يستجيب ويشتغل لأي حركه ويبعثلوا صاروخ باتجاه الهدف .. طيب ما العمليه راح اتم باب بيتي يعني الصاروخ راح يشيل بيتي والعماره وبيوت الجيران ويمسحهم مسح بالارض وما راح يظل الا ( الزرفيل ) وجواتو ( العود / الحديده / الخشبه ) ... هيك ما حلينا مشكله .
رحنا قلنا ل ( جوجل ) عمو .. هذا الحكي ما راح يجيب نتيجه وما راح يحللنا مشكله في حل ثاني او اختراع ثاني .. خلينا نحكي على مستوى كاميرا او اشي بسيط اهلي /عائلي /محلي/ مشاكل يوميه .. راح وغاب ولف ودار وراح جبلي كلمة (Mines ) يعني الغام .. ولك شو مالك .. شو قصدك بكلمة الغام .. ازرع باب البيت ( الغام ) حسبي الله ونعم الوكيل .. شو هالعقليه اللي صار يفكر فيها ( جوجل ) عقليه حربيه .. حتى جوجل اصبحت ( الازمه السوريه ) تشكل له هاجس .. وما في حلول عندو الا عسكريه .. وخاصة لما بكتبلوا كلمة ( اعتداء / زرفيل /بيت / تطبيش / تخريب ) ابدا فورا هاجس الازمه السوريه بسيطر على عقلية جوجل وبجبلي حلول عسكريه .. وبعدين مع هالشغله .. هاي الازمه طغت على الحرب العالميه الاولى والثانيه وعلى مشاكل العالم كلها ... هيك انا شايف .. فش الناس وراها الا الازمه السوريه .. خلص يا أخي .. خلي الناس اتروح على بيوتها وقيمولنا هالعده هاي كلها الباتريوت وابصر شو وخلي ( الزلمه ) يستهدي بالله ويخزي الشيطان .. وفكونا من هالازمه هاي .. ملحقين على الديمقراطيه والحريه والمقاومه والممانعه .. خربت الدنيا من ورا هالازمه .. روحوا على بيوتكم خلص ( والزلمه ) عندي .. ما راح يحكي معاكم .. وعد .. الموضوع عندي .. بس خليني الاقي حل لمشكلة ( الزرفيل ) تبع بيتي ومين قاعد ( بحشي / بدس / بزرق ) ( عود /حديده / خشبه ) جواتو .. يخرب بيتو بيت شو انو فاضي اشغال .. سببلي قلق وتوتر وحيره .. خلينا نعرف نتفاهم مع ( جوجل ) ويفهم علينا ونفهم عليه .. مع اني والله العظيم اني زلمه مسالم وبحب الجميع وبحترمهم وبالاخص الجيران .. والله ما في يوم بنسوي (اقراص سبانخ ) الا بنبعثلهم .. يا أخي احترموا اقراص السبانخ على الاقل .. مش راح نبعث لحدا اقراص سبانخ الا لما ( يشو / يحكولنا ) عن الجاني ان كان كبيرا او صغيرا .. ممكن يكون ولد صغير بتحريض من اهلوا او من تحريض خارجي ما بعرف .. منو لله بس .
عرضنا المشكله على الاهل والناس والمعارف .. وكان من ضمن الحلول المقترحه ( كهرب الباب / او اعمل منطقه عازله قدام بيتك وكهرب المنطقه / كهرب الزرفيل / كهرب المفتاح ( لأ .. المفتاح لأ .. مهو معي بجيبتي ) / كهرب ( المدام ) شو خص المدام ؟ ) بلشنا انخبص .. خلص كل الحلول اما كهربائيه وعسكريه والغاميه ..
طيب انو الله يهديه لابن هالحلال ويعتقني لوجه الله .. يا أخي ويقولي شو يدو وأنا جاهز يا عمي للي بدو اياه .. شو بدو يعني أرحل ؟ .. هو على كيفو .. وين أرحل وأشرد حالي من ورا ولد صغير / كبير ببعبش وحاطط عقلو ( بزرفيل هالباب ) ..
خطر على بالي طيب يا أخي ليش ما أخلع زرفيل الباب واريح حالي ؟ .. فكره اجتاحتني بساعة الذروه .. وقمت بتنفيذها .. وصرنا نطلع وننزل بدون عناء .. وبدون ما انسكر ولا نفتح زرفيل الباب .. مظبوط كنا انروح انلاقي التلفزيون شغال وفي فناجين قهوه على الطربيزه .. بس عادي .. مظبوط كنا انشوف في بواقي قلاية بندوره على الغاز برضو عادي .. كلو اهون من انك تقعد ساعه وانت اتحاول تفتح زرفيل الباب او اتقوم بكسروا واستبدالو فلست من ورا هالسولافه هاي .. بعينا الله .. يعني في ناس بتستغل البيت واحنا مش موجودين بس والحق يقال ما بنعرف هو حرامي هم ولاد الجيران هم الجيران نفسهم ما بنعرف بس حرام والحق يقال لهسه ما شفنا واحد تارك ( قمعة ) سيجاره بمكته .. معقول بدخن / بتدخن ارجيله ؟
شو أعمل حلول احلاهما مر .
ملاحظه : في امكانيه .. انا بقول اذا في امكانيه بعد أذنكم .. هيك هذول صواريخ ( الباتريوت ) الموزعه شمال ويمين ممكن ..ممكن يحرف المنظومه اشوي هيك اتجاه بيتي واكون ضمن المنطقه المحميه .. بوفر علي عناء استبدال الزرفيل .. الاحداثيات معي ( 079 : 00100) .. يا زلمه هذا رقم تلفونك .. اكلنا هوا .. انسى الموضوع .. يا حج ... يلي قاعد على صاروخ الباتريوت انا بمزح .
والسلام عليكم
Burhan_jazi@yahoo.com