فجأه وبدون مناسبه اقترب مني ابني الصغير كنت يومها قاعد بالمطبخ بشرب فنجان قهوه وقلي ( استسلم .. ارفع ايديك .. موت ) .. والله يومها (نقزت ) ..
- خير يابا شو في ؟..
-استسلم .. وقام ( يطرطر طرررررررررر) بهالباروده اللي معاه علي .. الاخ بلعب معي ( ما انا اشتريتلهم لولادي ثلاث بواريد بطلع شرار مع صوت (طرررررررررر) ..
- يابا استسلم ارفع ايديك .
- يابا يستر بيتك ....... الله وكيلك انا من يومي مستسلم .. انا نزلت من بطن امي وانا رافع ايدي .. انزلت مستسلم خلقه . حتى قالولي انهم نادوا ( الحجه وصفيه ) اتمرجلي ايدي بالزيت وقالولها ليش الولد ايديه متيبسات هيك لفوق ومدندل راسو.. عندو عيوب خلقه اشي.. قالتلهم لا بالعكس .. انا شفت زيو كثير .. هذا ابنك خويفه وجبان ومسالم اضحكي بعبك ..احمدي ربك .انشكحت امي هيك وكيفت حتى بانت اسارير وجهها .. وابوي قال بصوت خافت لكنه مسموع ( قل اعوذ برب الفلق .. من شر ما خلق ) بخافو من العين والحسد ليش الحكي .. استهلكوا تقريبا ثلاث تنكات زيت على انو ينعدل وضعي ما انعدل .. فاستغلوا الزيت بعدها للاكل مع الزعتر وعمل اقراص سبانخ ليومنا هذا .
الولد ظل يبحلق في وهو مش فاهم اشي .. يابا ... يفترض فيك اتقولي ( نزل ايديك ) ( ارفع راسك ) بعد هذا العمر..
ظل يبحلق في .. وقلنا احسن بكره بفهم .. اخلصنا من الولد هاظ نطلي الولد الثاني .. استسلم .. موت .. موت
- لا حول الله ولا قوة الا بالله .. يا رب شو اللي قاعد بصير .. شو مالهم لولاد . مصريين على اني استسلم .. شو هم فاكريني ( رامبو ) ولا اسكندر المكدوني .. ولا زلمه ذو هيبه وشأن .. انا ( طرطور ) انا بمثل صوت الباروده ( طررررررررررر) . وتعال فهم .
- يابا الله يخليك روح العب بعيد .. حل عني ..
هذول لولاد كيف بدي افهمهم إنو انا زلمه مسالم من يومي .. اي حتى قيل لي بأني وانا جنيين جوا ببطن امي كنت رافع ايدي وماسك بالقفص الصدري لامي ومدندل راسي لتحت زي ( المصلوب ) .. هيك ظهر بصور ( السونار ) ..حتى الدكتور قال لأمي ابنك منا فينا عربي اصيل .. مبروك يا حجه .. الله يقومك بالسلامه وتفرحي فيه واتشوفي هيك يوم منزل ايديه ورافع راسو .. وردت عليه امي وقالت .. يا مندرى يا رب .. وابوي يومها زعل ورد عليهم .. يكفينا شركم شو بدهم يقولوا العرب والناس عني هذا مش ابنو .. فسكت الجميع تحسبا للوقوع بمسأله عرض وشرف.
رجع الولد ( يطرطر ) بهالباروده بوجهي .. طيب كيف بدي اخليه يحل عني .. رفعت ايدي ونمت على ارضيه المطبخ وعملت حالي ميت .. وهجم علي بهالباروده اللي معاه وبلش طعن في .. بلعب معي .. عقلوا صغير .. لا انا اللي عقلي كبير ... نايم على ارضية المطبخ وعامل حالي ميت .. ( وطب ) ولا ( المره/المدام ) جاي ..
- قوم .. قوم يا شيخ .. الله يكبرك ..
- شو مالك ؟ بلعب لولاد .. مصرين اني استسلم الضعف.
- اخ على حظي بس .. قوم لحدا يشوفك ..
- والله حيرتوني بهالبيت .. واحد بقول استسلم وموت ...وانتي بتقوليلي قوم .. شو اللي بدكم اياه بالظبط .
- ما بدنا منك اشي خليك مع ولادك ..
بنتي الصغيره شافتني منبطح على الارض من تهديد اخوها اللي بالباروده وهات يا ضحك وعجبتها الشغله .. وبلشت تحكي زيهم .. موت .. موت .. هاها .. استسلم .. هاها .. واتجاوبت معها ما دامها بتتضحك لاحق العيار لباب الدار ..
الاول على نفس الموال .. فرفطت روحي يومها .. هجمت عليه قمت بعدها على اساس انو حفلة ( الهبل ) هاي خلصت .. رجع الولد واخذت منو الباروده وقلتلو ..
- هسه دورك انت استسلم .. موت .. موت
والله المنجوس ما رضي .. ما قبل ... ما رد علي .. بالعكس هجم علي وبدو يوخذ مني الباروده .. قاومت .. قاومت .. ثم استسلمت واعطيتو الباروده .. معقول هذا الفلعوص عنيد وعندو مقاومه اكثر مني ورفض الاستسلام ..
انا بتذكر وانا بجيلهم كنت مثلهم .. (فاكك / رابط الجأش .. باهت / قوي الغريزه .. ذليل/ عزيز النفس .. خانع / شامخ المنكبين .. خافي/ واضح المعالم .. كاشف / ساتر العوره ..بطيء / سريع البديهه .. هزيل / قوي البنيه ( مع نقص طفيف بفيتامين (د) بصراحه يعني ) ولما اكبرت رويدا رويدا بدأت هذه الظواهر تختفي شيئا فشيئا لما وصلت لمرحله اني ( انبطحت ) على ارضية المطبخ .
بكره ولادي على نفس الموال راح يجي زمن عليهم (ينبطحو ) على ارضية المطبخ معلنيين استسلامهم المتراكم فوق استسلامهم الفطري .... وهذي ظواهر الرجوله والشماخه والمقاومه راح تختفي زي ما صار معي ( فرد شكل ) .. ليش التخويث ما احنا عارفين الصح وراثه الشغله .. جينات ... مع اني والله كنت مستبشر خير يطلع واحد من عيلتنا زلمه .. كل ما يجي واحد انقول هاذ هو .. اشوي .. الا سلامتك وتعيش يطلع زيي .. جربنا ثلاث مرات مفيش فايده .. انا راضي بنصيبي .
هسه انا وكيلكم محصور فكري بين جرة الغاز وكرتونه البيض وبس .. سري مري .. اعلى نقطه ابداع وتفكير وذكاء عندي لا تتجاوز هذا السقف ( الجره والبيز/ض) في اطار الانبطاح الفكري .
ورجعوا لولاد يلعبو مع بعض ويلعبوني معهم ( حرب ) على موت على استسلم .. انا طخيتك .. علقت الباروده وهذا متخبي وراي الكنباي .. وانا حاطط طنجره على راسي خوذه .. جو عائلي هبلي مضحك مبكي مخزي فضايح حتى ( زوجتي ) ما سلمت منا . اشركناها بالحرب غصب عنها وانهبلت زينا .. وانا الان بكتب هذا المقال من ارض المعركه .. ( طخخخخ .. طررررر... صراخ .. وتكسير .. ومسبات .. الك .. الي .. بطلت العب ... لا العب ... انبطح .... راح (النيون) انطبش .. انكسر .. الله بعوضنا .. الناتو .. لاجئين .. منطقه عازله .. الجزيره .....ما ظل عاقل بعيلتنا .. احسن .. طخ .. طرررررررر ) .
ملاحظه : اللي عملوا فتوحات من الشرق والغرب والهم بطولات وامجاد واتصارات شو يا ترى كان ( ابوهم وامهم يوكلوا ) واحد يقولي .. سردين .. جربتو .. ثوم .. جربتو .. عسل .. جربتو .. ولا الشغله مش بالاكل ليكون .. ليكون الشغله بالنفسيه الزفت .
والسلام عليكم
Burhan_jazi@yahoo.com