روح يا جبر جيبلنا بندورة من عند أبو الكايد ولا تنسى كيلوا بصل وقرنين فلفل، اليوم غدانا قلاية بندورة وخليه يسجلهم عالدفتر. الله يعينا على هاليوم بس لولا هالدرج أبو أربعة وأربعين درجة. صعد جبر الدرج ولما وصل للنص سمع الوالدة بتنادي ... جبر لا تنسى تمّيل على المخبز وتجيب اكمن رغيف. ياما، هو المخبر بعطي بالدين كمان واخليه يسجلهم عالدفتر، لا ولك هذا اللي أول المخيم وبيبيع خبز طابون بس تعال خذ شلن حق الخبز.

إنزل أطلع وآخِرة هاليوم ... وصل جبر عن الدكنجي وهو في نفس الوقت خضرجي وبيبيع مكانس وكاسات شاي، يعني مول مصغّر من تبع هالأيام. الخضرة مصمودة برة بشكل مائل زاوية خمسة وأربعين، اعطينى كيس ورق عمي أبو الكايد بدي أعبي بندورة بس ما في أحسن من هيك نادى جبر. خذ هالكيس ونقي من هاي البُكسة كويسة. مد جبر يده على الحبة الأولى ودورها فوجدها مخرومة والثانية مشقوقة والثالثة ذبلانه، والله لو ارجع بهذول عالبيت لأوكل قتله، فكر جبر وتذكر أن هناك مستودع صغير في آخر الدكانه فيه بضاعة وكثيرا ما كان يستخدمه كايد قبل ما يتجوز شهيرة بنت المختار. طل جبر برأسه خلف القاطع الخشبي فرأى بعض البكس فيها بندورة وبذنجان وموز وتفاح ... بس شو أشي بيشهي. عمو أبو كايد بيصير آخذ من هذول. طبعا لا هذول توصاية للمختار، روح نفقي من اللي برة. 

عاد جبر يقلب في البكسة أياه وقال المخرومة بتبطل مخرومة لأنها بدها تنفرم بس ما يكون الخرم طاقة لدودة في الداخل، أما المشقوقة فهذا من كثر الانتفاخ ودليل على النضوج أما الذبلانة فهذة مستوية وخرج قلاية.

موضوع البصل كان أرجى شوية فنقّى أكمن راس، أما الفلفل فيحتاج خبرة ... عمي أبو كايد، شو بالنسبة للفلفل، حار وللا لأ سأل جبر. يا أبني هذول خرج قلاية لأنهم بيخلوك تلهط لهط من كثر ما بدك تطفي حر اللقمة بالثانية. عمي ... خلي هالكيسين عندك وانا راجع بوخذهم ولا تنسى تسجلهم عالدفتر. 

خلصنا من المشوار الأول بس الثاني بعيد وفيه طلوع ... ما هو طهطور يا عمي، وصل جبر الى المخبز واشترى خمسة بخمسة ورجع واتناول الكياس من عند أبو الكايد وسلمها لأمه ودعى بس ما تناديني أفرم البندورة... شريط ذكريات مر على مخيلة جبر عند تصفحة بعض المواقع الإلكترونية حيث يطل عليك رؤوس المرشحين للنيابة تماما كما بندورة أبو الكايد اللي برة وبدك تنقي منها، أما اللي جوا فمحجوزة للأعيان.