شو اللي بده اياه الشعب؟ شو الحلم اللي ما اتحقق؟ ليش دايما الشعب مغلب الحكومة بطلبات الها اول ما الها اخر؟

اصلا طول عمر الحكومات(من قامت حوا لليوم)وهي شغاله على راحة الشعب، اكثر من هيك شو مطلوب؟ غريب فعلا امر الناس يعني شو رأيكوا الحكومات تقطع حالها؟؟؟؟.

شوارع وعملت بكل حاره لا....وزينتها اسود واصفر وحتى ما حدا يحكي عملت مطبات الدنيا فيها مشان الناس ترضى..... اشارات ضوئية / انفاق/جسور/دواوير/على كل حلم لكل مواطن

كل هذا ومش عاجبك؟ مش فاهم ! يا اخي الحكومات ما خلت طرق تجيب فيها مصاري من برا الا وعملتها ومن جوا البلد اسأل حالك كم توخذ من جيبتك، بس ارضى ومش عاجبك؟!

تسمح لك توكل وتشرب وتأرجل كل انواع المعسل انت تحرق الفواكه بأرجيلتك وفي ناس مش قادر يشم ريحتها جل للشعر فيه، اواعى ضيقه للشباب والبنات فيه ،سينما وبزر ابيض فيه، شو بدك كمان؟؟ روح... ولأن الحكومات بتعرف شعوبها كويس امنت لك غاز عشان تطبخ وتنفخ لكن عاد مش ذنبها اذا نزلت دموعك وانت تفرم بصل ولا هو ذنبها اذا وقعت بمسيرة وسال دمك. بكفي عاد مش عاجبك العجب ولا الصيام برجب.........

مدارس وجامعات عملت وما خلت حتى هالبشر يتنجر ،اكثر من مدارسنا مافيه ،اكثر من جامعاتنا ما فيه ومش ذنبها اذا الطلاب غشوا والا الدكاتره اخذوا لبن او سمنه بلدية او غيره

شو ذنب الحكومه اذا كان البحر ميت ،واذا كان الميناء عقبه بوجه الاستثمار،وغير هيك بدك تغير حكومه؟؟ بدل الحكومه خذ حكومات ،وبدل النواب خذ نوائب ،وبدل القانون خذ اقنه

كمان ما يكفي انها باعت المقدرات الوطنيه والموارد الطبيعية ، عشانك يا محترم ولسه مش فاهم يا عمي الحكومة وفرت لك كل شئ وانت في بحبوحه تحسد عليها،،، خليت العربان يتشمتوا بينا ويضحكوا كل جمعه وانت فاتح صدرك وطالع........لوين وبعدين؟

بدك ميه بارده فيه ،حاميه فيه، وجبات خفيفة فيه، بدك هوا بتطعميك لما يصير معك نفاخ وهي رح تنفسلك.

1. كل شي اطلبه رح تعطيك اياه الا انك تقول بدي مصاري....لأن الحكومات عارفة انك صّريف فعشان هيك هي بتصرف عنك وعارفتك ما تستاهل النعمة فخليها تعيش وانت خليك للتفاهات الأسبوعية

....لا تخلونا نزعل من بعض، قلتوا بدنا وظايف...وظفناكوا، بدنا رواتب ....اعطيناكوا، بدنا قروض ...رهناكوا ، شو ضل غير هيك ممكن تعمله الحكومة عشانك ؟؟!!

عشانك عزيزي يا شعب، عينالكوا عشرات الوزرا، ومئات النواب...وبعدك بتطارد بهالشوارع يا اخي هاي البلد هيك زي قالب الكيك. وعشان ما تزّور حضرتلك عصير كوكتيل اسمنت، بوتاس، فوسفات، رمل رم،====خض القزازة كويس لما تفور واشربها وانت قاعد بالكازينو وهيك بتكون اخذت حصتك وشربت عصيرك يا وطن....

فيصل البقور

24/6/2012