يبدأ التحضير قبل اسبوع حيث يوم الجمعه ناوي اخذكوا شمة هوا (الكلام للعيال ) طبعا ينطوا فوق وتحت اكثر من مره وام العيال تقول يخلف عليك والله بدها تغيير جوا , ولأنه حمش كثير يقول : طيب خلصنا من القصه والا ابطل تراها واقفه على حرف الخاء , تسكت الحرمه ( صار له قديش مره ناوي ويبطل ) اسكتي يا مره خلينا نشوف . 

 
بعد شويه ما تقومي تحضري اغراض الرحله ( بلغة التهديد )......... 

 
تقوم وهي على يقين ان الرحله باقي الها اسبوع كامل من النكد والعصبيه ( حاضر انا قايمه ) حاب شي معين احضره من هسا ,تسأله 

 
ينظر بنص عين ومن فوق لتحت ويهز راسه , تستدرك وتقول اللي بدك اياه رح اجهزه ليلة الرحلة.
بعد شويه ينادي عليها بصراخ واضح , ترد عليه واديها مبلولات نعم . شو ساعه لما تردي , كله هذا تحضير للرحلة هسا ابطل والعن ابو الرحلات على ابو يومهن . 

انا بدي اذكرك ببعض الاشياء تحضريها وان شا الله تنسي شي ترى اذا عرفت انك ناسيه شي ....لو كنت بنص الطريق ابطل الرحله واروح وانت عارفه الصحيح . 

وتوخذه عيلته بالعقل شو ناوي تذكرني ...قول . 

 
يبلش المخشب يوصي :حطي شويه خضار مشان السلطه وكثري الخيار والبقدونس مش توكلو الخيارات على الطريق, بعدين ميه فلتر حطي قالون وممنوع حدا يشرب منه على الطريق لما نصل وبعدين اللي بده يتسمم يتسمم , الجاجات اللي بالفريزر واللحمات كلهن ما تخلي شي خلينا نطعمي العيال كويس لا تنسي البهارات , وقبل هيك لازم تعرفي اني رايح امر على امي واخذها معنا ويا ويلك اذا حسيت انك برمت بوزك سواء هون او بالرحله , شو قلنا رح نوخذ خضار ولحمه وجاج وفحم ارجيله والمعسل لا تنسيه 

حفايه ان شا الله بدك اياني اضل لابس الكندره من الصبح للمغرب
طاوله اكل الكراسي لا والا شو رايك مشان اوديك رحله ارحل الاثاث كله
بريق الشاي اللي تحب تشرب منه امي
شرشف او حرام وجنابي ومخدات (هاي رحله طويله )
اه رحت ما انسى الخبز كثري خبز قد ما تقدري بلاش ننقطع
اذا بدك تسالي ودي الولد على الدكانه يجيب بعشر قروش( بزر مطلقات ) لا حدا حوش ,عدة القهوه الحلوه والكاسه اللي اشرب بيها دايما , طبعا خبز سندوويشات 

 
( زوجته ما زالت واقفه ) وبكل تركيز مشان ما تنسى شي طبعا كل اللي يوصي عليه يمكن تشتريه من اي محل على الطريق تقول لحالها لكن لا حول ولا قوه الا
وغيرها من الاشياء اللي تحبي تجيبيها معك , تلبسي جلباب وتلبسي البنات كمان مش ناقص مشاكل مع الهمل اللي ممكن نشوفهم بالرحله فاهمه والا اعيد ترد وهي مخنوقه طبعا فاهمه 

 
وكلك زوق توخذي معك طبخه من هون جاهزه ( مقلوبه , منسف , ورق دوالي....)
وحذري العيال ما بدي نطوطه هون وهون يقعدوا يشموا هوا وبدون ما يطيروا هناك وهناك فاهمه والا انت عارفه بالحزام اصبغ جلودهم قبل ما نطلع بالرحله 

 
وبعد كل الخطابات واكثر من ساعه وهو يعيد على مسامع زوجته اوامره , زهقت الحرمه حياتها مش بس الرحله وهسا ظل شي بدك توصي عليه والا اروح احضّر
يرد هو: شو كأن الحكي مش عاجبك , ؟؟؟؟؟
لا والله ما فيه شي بس فكرتك خلصت . 

 
انا لما اقول خلصت تنقلعي على المطبخ وقبل هيك تضلي مزروعه قدامي , هاي اخرتها يا بنت ابو الرقع مش عاجبك كلامي .
يا ابن الحلال انا مش حاكيه شي وهيني استنى شو بدك تؤمر مشان اسويه .
تتخوثي شو قصدك ( تؤمر ) حاسك مش عاجبك
ومن يوم السبت حتى مسا ليلة الجمعه وهو يعيد السيناريو على زوجته... اخر الليل بعد ما نام العيال مسك التلفون وبده يحكي مع امه رن الجرس مره ومرتين.... ان امه!!!!! ترد وبعد اكثر من محاوله صحيت الحجه, اه يمه شو بدك , يمه بكره رايحين رحله ورح امر عليكي مشان تروحي معنا ,تكوني صاحيه بدري ان شا الله . وقبل ما ترد الحجه اه او لا اغلق الخط .....
نظر الى زوجته وقال ان شا الله ترضى عني .
الزوجه بس لو حكيت معها بدري او حكيت الصبح لأنها اكيد نايمه هسا وانت صحيتها الله يسامحك .
شوشو شو اقولك علي الطلاق ما نروح رحله بكره مشان ترضي بدك احكي مع امي على كيفك وبالوقت اللي بدك اياه........

فيصل البقور