فيصل البقور

انظر كيف امست تلك الحراكات الاصلاحية , وما سار الى جنبها من احتجاجات واعتصامات , وما تبعها في بعض الاحيان من اضرابات , انظر بعين واحده ( سكر عين وافتح عين ) رح تشوف بالعين اليتيمه , تطور كل ما سبق واصبح يساير الحكومة ويغني على ليلاها , بالمناسبة هذا التطور غير طبيعي , لأن بالضرورة تلك المطالبات وعلى مدى اكثرمن سنة ونصف , كان حري بأي حكومة بالدنيا ان تتنازل عن بعض كبريائها , وترضي الشارع الذي تحكمه , ذلك يحدث في كل اصقاع الدنيا الا( صقعنا ) , لكن آن ان نرفع القبعة للحكومات الاردنية , اذ انه رغم ما يجري في العالم المربعن (الربيعي) , ومع كل الخوف من انتقال ذلك الفيروس ودخوله الاراضي الاردنية ’ وجدنا بكل امانة مقدرة كبيرة من الحكومات على قراءة الشارع , وحفضه صم ’ واحيانا تسميعه ’ فتركت لهم الحريه المناسبه لقول كل الحكي اللي بدهم اياه , من شعارات وخطب عصماء ,منها ما تعدى السقف ومنها ما وصل الحضيض من الاسفاف , وصلت حد الرعونة في بعض المرات .

ولسان حال الريس :خليهم يطلعوا ويحكوا واللي متضايق ينفس, واللي منفس ينتفخ . يا عمي كثر الحكي ليش , حكومات وعارفات الشعب كويس , لأنهن على مدى عشرات السنين ( الشعب همه على بطنه والحكومات بتزرع وتغذي هذا الحال ( عشان ( كل ده على رأي المصاروه) , بيعرفوا كل سكان عمارة الرابع لوين رح تصل الامور وهذا بحد ذاته سبق سياسي لها .

وخلينا نحكي بصراحة ما اظن اي عاقل ما وصل له فكرة اختراق التحالفات , والحراكات , من قبل الحكومة وهذا يحسب لها لا عليها , لأن مدعي الاصلاح ينادوا بعالي الصوت انهم يحسنوا القرايه , وان اي دخيل لم يخترق صفوفهم وافكارهم ( يا اخي دخيل الله , مش معقول تتركوا الحكومات هيك الا اذا كانت تعرف شو رح تعملوا بكره, هذا اذا كان فيه تخطيط من اصله ) والخوف انه السالفه اللي بتصير مش اكثر من( فزعه) , يعني لا في نهج ممنهج ولا فيه خطط مخطخطه .

وكل ما سبق بدل دلاله واضحه ان الشارع يتظاهر ويعتصم وغيرها من عالخربطات اليوميه تحت سمع ونظر الحكومه, ان لم يكن بأخراج وسيناريو حكومي .

ذلك ممكن الحدوث ,لأن بعض القوى الفاعلة والتي تحسب لها الحكومة الف حساب لم تقل كلمتها الفصل حتى اليوم .

وحتى تبقى هذة القوى قاعده وساكته , رح تقبل الحكومات كل الحراكات وخلافة وتلعب معهم لعبتها(شد الحبل)..... بس المهم عند الحكومه هو خلي اللي يحكي يحكي ,واللي ساكت ساكت والثاني تحت المجهر(يجيبوله تسالي ومكسرات)

مشان يضل قاعد عاقل وما يجيب مشاكل . فالشعب حكومي , والمعارضه حكومي . والنايم والقايم حكومي . والحكومه حكيمه .

وحتى مع التعداد القادم رح تشوف ان الشعب هو الحكومه والحكومه هي الشعب,

هيه الشعب والشعب هيه . هيه الشعب والشعب هيه

عندها بس رح يكون السبت فات مش عارف وين (اليهودي) , يعني حكومة حراك , وحراك محكمن عالمزبوط .