بدون مقدمات وباتجاه الموضوع مباشرة وبلغه تخلط العاميه بالفصحى ....مثل هالحكومة ما شفت بحياتي . ما بعرف ليش خطر ببالي الحرامي اللي بده يدخل بأسرع وقت ويشيل قد ما يقدر ويفل ، الحكومه الحاليه هيك بالضبط ، أتمنى لو كان في مراقب بس ثبت عدد التعيينات بالمناصب العليا منذ بدء عمل الحكومه لغاية اليوم ، شيء خيالي فعلا يا ريت سرعة العمل بصالح المواطن مثل سرعة الاحالات على التقاعد و وضع البديل فورا .... ، ما ظل ولا مكان عليه العين الا وانحط فيه زميل دراسة رئيس الحكومه وابن العم وابن الخال والجار والجار بالجنب والصديق ، وصديق الصديق ولحق الدور لنسايب بنت العم وكل الحبايب نالهم من الود جانب والله مش معقول نهائيا. يا جماعه اذا كان هيك طريقة تفكير رأس السلطة التنفيذية ، فتره قصيره ولازم نطلع بأكبر قدر من المكاسب شو يحكي العوام اللي مثل حالاتي.

شيء محزن للغاية ، الله عليك يا وطنا ....راح زمن الخير والرجال اللي كانوا قيادة حقيقية وقلبهم على الوطن، كان في أخطاء أكيد بس كان في خوف من الخطأ أو الوقوع فيه. هذه المرحلة ما في خوف عند المسؤول ولا عند الناس...سلطة القانون مغيبة تماما وأصبح الشعار خذ حقك بايدك ...مصيبة المصائب...بحكي دائما الله لا يوقعنا بمسألة تحتاج شكوى لأحد لأنك سترى العجب العجاب..راح تشوف حقك بروح منك وانت لا تستطيع أن تفعل شيء الا القهر والكبت والنتيحه المعروفه بعد فتره جلطه أو سكري...أو الاثنين معا تخبط في جميع مفاصل البلد قطاع عام وخاص لا أستثني أحدا...حتى العاقل انجن لأنه اذا انجنوا ربعك ، عقلك ما بنفعك ما بدي أطول عليكو بس لو ما كتبت هالسطرين كنت راح أنجلط...الله يستر