اخبار البلد

بقلم: جمال المصري

صدقني يا وطني إني بحبك ، لأنه ما إلي غيرك ، وعلى قول المثل : ( مين ترك داره أنقل مقداره ) وأنا ما بقدر أتركك وأهاجر ، لكن أنت عرفت مين أنا يا وطـن ؟؟ أنا المواطن التعبان .. الجوعـان .. القلقــان .. البـردان .. الطفــران ، هالكاني الديــون والفواتير والقضايا من قلـّة المصـاري .

لكني قررت اليوم إني أحكي ( وأفش غلـّي ) .. ملـّيت من حكي وزير رايح ووزير جاي .. رئيس رايح ورئيس جاي .. وكلهم بيقولوا عني وعنك دايماً نفس الكلام : ( المواطن والوطـن بخير ) !! ، مع إني لسّه على حالي وللخلف مش لقدام .. بيقولوا الوطن غالي وأنــا ما بنكـر ، بيقولوا الوطن دافي مع إني بردان ، بيقولوا تقشّف وشدوا الأحزمة .. وبضحك لأنه ما عنـدي حزام ، لأني وفـّرت حقـّة دفاتر لمدرسة ابني .. بيقولوا الوطن أمـان .. وخايـف أصحـى صبـاح يوم وألاقي خلقة هالراتب ما عاد يطعمي ولادي خبـز وبنـدورة ويسكّــر هالفواتير .. وبـيتي الله وكيلك سكّر غير كيلو ما بقدر أخزّن فيه ، وخبــزات الأولاد كـل يـوم بيومـه ونفسي أخزّن أكثر لأني خايف أصحى بيوم وأكتشف سعره ارتفع وما أقدر عليه ، والعدس بكذب عليك إذا قلت لك قادر أشتريه ، ولأنه كمان بدّو ليمون وخلـّي سعر الليمون على شقة .

قال رفعوا ( بعض ) أسعار مشتقات النفط .. والكهرباء .. والضريبة على البنوك وشركات التعدين .. وعلى ناس ثانية ( مرتاحة ) مش علينا !! طيّب ما هي هالناس الثانيـة حتلف وتدور وتاخذ اللي أخذتــوه منهم .. مني ومن الغلبــان !! ( حكومتك ) يــا وطن هسـّه صحيـت وقالــت ( ترشيد استهلاك وضبط الإنفاق العام ) ، وقالت كمان خفض المخصصات الإنشائيــة للجـــيش والمخابرات والدرك والأمن العام ، وهذا حيوفـّر ( عليك يا وطن ) 150 مليون دينار ... وكبار ضباطنا الأكارم أتنازلوا عن 15 % من رواتبهم ( لخزينك ).. طيّب هذا الحكي ليش ما صحيوا عليه من زمــان ؟ وباقــي النـاس ( المرتاحيـن ) : الوزيــر والنائب والأميــن العــام .. والوكيل والمستشار واللي بالأعيان .. الخ ، اللي رواتبهم بالعلالي ( اللهم لا حسد ) فينهم لسّه نيام؟؟ .

أنا وغيري بنمشي على رجلينا بشوارعك يا وطن بحذاء عمـره عشر سنين ، مــن شغلـنا لبيتنا حتى نوفـّر دينار المواصلات ( بالكوستر التعبان ) .. لكـن مسؤولينك يا وطن كــل واحــد عنده سيارة وسيارتين .. وبنزين وسايق وصيانة مجاناً كمان ، علـى حسابــي أنــا والغلبــان ، تليفوني الوحيد بالبيت إنفصل وبدينار واحد مــش قــادر علــى شحنــه ، فقلـت أتركـه ينـام .. وموظفين حكومتك ومؤسساتك من الرئيس للمراسل ، خط وخطين ببلاش وبيجوز ثالث كمان .. وعروض إلهم أشكال وألوان .. آسف ( على حساب الغلبان ) .. أنا لسّه بحبك يا وطن .. لكن كثر الشـّد بيرخي .. فبلاش أزعل عليك ويضيع من قلبي الحنان .