على الحكومة اليوم قبل بكرة , التفكير الجدي والعميق , بخصوص اعادة قانون خدمة العلم لحيز التنفيذ ,
لأنه بعد ما وقفنا خدمة العلم , كثرت بلاوينا : زعران , زعلطيه , سرقات , حرمنة , وكمان صرنا نسمع بأفكار واقوال , نابعه من الشارع من طخ على الحكومة اللي فوقها واللي تحتها , يعني سوالف المسخرة اللي تطلع كل لحظة , هي ابن شرعي لقلة الشغل , واللي شايفه سبب في ذلك هو الحكومة نفسها , ماده الحبل كثير , على اساس شعار الحرية ونسي الشعب ان الحرية لا تعني الولدنة .
رجّعي يا سيدتي يا حكومة , الخدمة العسكرية , واقترح ان تشمل من هم اقل من 30 سنة , وان شكل هذا ,
عبئ مالي , مش مشكلة حطوه فوق كوم الديون .
مع ارتفاع نسبة البطالة بالبلد ومع كثرة الخريجين من المدارس او من الجامعات واللي الله اعلم كيف نجحوا وتخرجوا , قولي يا حكومة انت شو ذنب , عشرات الالاف من الشباب , عواطلية , دايرين بالشوارع والحارات , او المقاهي , عند مدارس البنات عند اي زاوية او اي عامود كهربا بالليل لازم تلقى اخوة للعمود , يقضوا معظم الليل عنده برمضان وبعد رمضان تلقاهم ليل نهار عند اخوهم ( العمود ), ما يخلوا بني ادم يمر , الا يكبوا زناختهم عليه .
تعالي معي نتخيل هؤلاء الشباب بس يتخرج يلاقي حاله , بسيارة عسكرية , رايح على خو , وهناك يتعلم الرجولة من جديد ويزرع فيه اشياء اخرى ترتقي بالمجتمع يعلمها المختصون . بعد هيك نفحص بمقياس او ميزان المجتمع , كم تعّدل سلوك , كم ازداد حب الوطن , كم انخفضت قلة الحيا , كم صار عنا رجال ممكن يحموا حالهم واهاليهم وطنهم , واعتقد ان الشاب قد يدرك مقدرة اهله المالية فلا يطلب منهم اكثر من طاقتهم , وايضا سوف يقدر وضع البلد والحكومة , ولا يطلب من الحكومة المستحيل , اذا فسوف يذهب لعمل خاص به , او يتجه للقطاع الخاص , تارك للحكومة عبء غيره حتى تحمله .
ومن جانب اخر قد تقوم الحكومة بطلب مبلغ من المال من الشباب اللذين لا يريدوا الدخول بخدمة العلم ,ممن قد يكون عمل عملا محترما في داخل الاردن او الخارج , وهذا سوف يرفد الخزينة بمبالغ طائلة .
على فرض انها سوف تعيد الخدمة فعليا , وكمان وهو الاهم سوف تجد الحراكات و المسيرات ما غيرها , قد انخفض عدد المشاركين فيها , لأن نسبة اعضاء الحراكات من الشباب قد تتجاوز 65% اقصد اللذين تقل اعمارهم عن 35 سنة .
وشوف معي كم عصفور صادت الحكومة بحجر واحد
