خاص - عيسى محارب العجارمة- قبل يومين انتحر اردني اربعيني من الطفر والديون والهموم ودمه برقبتك يا دولة ابوزهير انت وكل مسؤول بهالبلد .
ما عاد الترقيع ينفع اذا وصلت بالرجل لينتحر من اجل يتخلص من طق الديانه على باب بيته .
وين معتز وين رجال باب الحارة وين ام جوزيف عن هم الاردنيون وانت بنظر الشعب اليوم صرت ابوجودت وصديقك من صدقك يا دولة ابو زهير .
اما اذا بحثت عن الحل بجيب لك من الاخر اني قبل شهرين من اليوم فريت من بيتي وطلبت باب الله على العقبة ادور شغل بشركات التخليص دولتك و28 يوم وانا من باب شركة تخليص لباب شركة امن وحماية بعقبة المستثمرين والتجار والشطار وعدت بخفي حنين .
كنت بدي اطلع على عمارة البرج بعمان وارمي حالي واستغفرت ربي لان الانتحار حرام بعدين ديوني مش مستاهلات الانتحار اقولك اللي اله علي دين ينتظر لما اخذ اسكاني العسكري وبسده او يبلط البحر او يسجني السجن للرجال دولة ابوزهير .
ياباطل اربعيني ينتحر بالاردن وانت بتتفرج ابو زهير المهم شو الك بطولة السولافة واغليها على الحرة الزرقاء وجمرك عمان ومؤسسة المواصفات والمقاييس ومؤسسة تشجيع الاستثمار المهم الاقي تاجر اخلص له معاملة وبالنص بيني وبين شركة التخليص لما وجدت ضالتي المنشودة ,
وجدت مندوب شركة بترول دولية دولة ابوزهير من جنسية عربية ومعه كذا جنسية غربية (ولد بزدونت )على راي اخوانا الاتراك مستثمر من الاخر لكن والله ما بشتريه بسوق التنك بقرشين .
المهم حط الليف هات الليف والقطه واحنا المخلصين الجمركيين وخاصة العاطلين منهم عن العمل مثلي اذا لقط تاجر ما بتلقطة العافية .
والله يا دولة ابو زهير واشيله وعلى اكبر شركة تخليص بالاردن واقعده مع صاحبها ويتفقوا على توريد معدات بير البترول من (؟)الى مطار الاردن ثم لمنطقة البحر الميت ووعدوني بمائتين الف دولار عمولة الي يعني مائة واربعين الف دينار نيره تنطح نيره .
الان البضاعة لسا ما وصلت للبلد والولد البزدونت مندوب شركة البترول يعطيني ابر تخدير ومواعيد عرقوب والك عندي ياابو الهندي .
حسب اخر المعطيات انه راج بعد كم يوم يرجع للاردن واذا ضبيت لساني بثمي بقبض 200الف دولار اتعابي بس حاشاك بيت الفقر بيستحي من الغناة .
قبل كم سنة كنت مامور مستودع خاص بالمطار وحصلت اكبر تهريبة دخان فيه على مستوى البلد وكانت حصة كل مهرب 100 الف دينار سواء مخلص جمركي او موظف فاسد وتركتهن حسبة لله تعالى وهي قصة معرفة للقاصي والداني بالمنطقة الحرة بالمطار .
انا ضميري بيوخزني لعنة الله عليه من ضمير لاني لسا مديونير وطفران وعلي فوق 16 الف دينار واذا بصبر كم يوم بمسحهن بجرة قلم ومابفوت السجن .
ولان المساله مساله ضمير اسال الله انه يصحي ضميرك انت وكل مسؤول سابق ولاحق بهالبلد كرامة لتراب الاربعيني اللي انتحر امبارح او اول امبارح واطلبني لعندك وخليني اخبرك بالمصيبة الموجودة على لاب توب الولد البزدونت واين موقع ابار البترول بالتحديد.
وعيب على شاربي اذا ما اغنمت شارب كل اردني لانه بترولاتهم موجودة وبحلف بروح والدي والبيت اللي حجيت اله وراس كل اردني جلالة الملك المعظم ان الموضوع جد الجد وفيه العلاج والحل والخلاص وان الشركة الدولية اذا طلعت البترول ما النه منه غير القشل حاشى السامعين .
انا عارف ان نهايتي راح تكون رصاصة غادرة براسي نتيجة هالمعلومات الهامة وان بترول الاردنيين راح يلحق الفوسفات تبعهم او الذهب التركي اللي بيسد كل مديونية الاردن .
لكن انا فدا كل فقير وفقيره بالاردن بالمخيم والريف والبادية من الغور للاجفور ومن الهضبة للعقبة وختاما اطلب من كل عجرمي وعجرمية من ابناء عشائر وقبيلة العجارمة ان يفتخر بي بعد هذه البشارة التي سقتها بشارة لكل اردني واردنية وان كان الثمن روحي الرخيصة وفداهم جميعا .
انما الاعمال بالنيات ونيتي خدمة الملك والشعب اذا لقوا اولاد حلال (واشك)
والله من وراء القصد
اللهم لا تجعلها صرخة في واد ولا نفخة في رماد
الله الوطن الملك
وبترول الاردن لشعب الاردن اقطع
issalg2010@hotmail.com