ذهبنا برحله عائليه لأحد الاماكن التي يفترض ان يكون بها شجر ... على اية حال وجدنا شجره وجلسنا تحتها ... وبعد مرور ساعه جاء شاب معه ( حمار ) وسألته ان كان لديه العزيمه او نوعا من الأصرار او ينوي تسويق حماره ... فأجاب بالقبول .. وسألته كم تأخذ على ( ركبة الحمار ) ... قال لي ( ربع دينار للشوط الواحد ) لك ولأي ولد من اولادك .. وكوني صاحب فضول اردت ان اركب الحمار .. ودار هذا الحديث بيني وبين الحمار بعد ان تنحى صاحب الحمار جانبا ..
- انت بتزعل لو ركبت عليك .
- لا عادي يا أخي .. هو انت اول واحد .
- طيب انا ليش صدقا متردد من هذه الفعله .. بحس اني بهينك يا رجل .
- اركب .. اركب يا عمي .. عمرك شفت بحياتك واحد بقلل عقلوا وبناقش حمار .. يعني على شو بدو ينتهي نقاشنا .. انا راح أظل حمار ... وكلامي لا راح يودي ولا يجيب .. فسيبنا من هذه القصص ونط يا عمي وخلصنا .. بلاش يزعل الشب صاحبنا هسه .
- على قولتك ... وهي ركبنا .. وين بدك توخذني هسه ؟.
- انا عارف ... وين ما بدك .. بس لا تنسى انو الركبه بربع دينار زي ما قلك الزلمه صاحبنا .. يعني كل اشي بحسابو .
- مفهوم .. عارف ... والله عارف ... طيب امشي لقدام هسه اشوي .. يعني بحركة ربع دينار .
- حاضر يا سيدي .
- بتعرف يا حمار انك خلوق .. وبتوخذ وبتعطي بالحكي ... يعني لا بتتذمر ولا بتشكي .
- ومن شو بدي اشكي ... انا معفي من مسؤوليات كثيره .. انا همي الوحيد هو اني اكل واشرب لما اموت ... انا المطلوب مني بس احمل أي أشي وفق طاقتي ... هاي وظيفتي بالأرض .
- طيب خلص خلينا نرجع .. بعدنا كثير .
- حاضر ... انت شو اسمك ؟
- انا اسمي برهان .
- عاشت الاسامي .
- الله يخليك .
- وشو بتشتغل .
- شو بدك شو بشتغل ..انسى ... انا مسؤولياتي ومهامي الموكله الي بالأرض اكثر منك .. ادعيلي انو الله يكون بعوني .
- اه والله .. علي بسمعوا وبشوفو .. والله صدقا الله يكون بعونك انت وكل الناس ... أي شو هاذ يا زلمه .. انا مرات كثيره بسمع الناس بتداول الاخبار والاحداث والكل بصراحه مش مرتاح .. الكل مهموم ومزعوج .. بحمد الله انو خلقني حمار مش بني ادم .
- هذا أمر الله .. بس هذا لا يعني انو انت لا تواجه متاعب الحياه .. اي احمالك الثقيله صدقا انها مرهقه ولو بفتره قصيره من عمرك لكنها مهلكه .. بس الحلو بالموضوع انو انت يوم القيامه راح تتحول الى تراب .. يعني ما الك حساب ... هاي لحالها نعمه .. انا بدي اقولك شغله مهمه .. احنا والله بنعيش بخوف دائم .. الخوف من نكبات الحياه والخوف من مصيرنا يوم القيامه .. والله الواحد ما بعرف يمكن مقدر الو انو يدخل نار جهنم .. هاي لحالها مصيبه .
- أصبت ... وهي خلص الشوط تبعك .. بتحب اتجدد .
- لا انا خلص بكفي .... بدي اركب ولادي شوط صغير برضو بربع ليره .
- ما شا الله ..هذول ولادك .
- ايوه .
- الله يخليلك اياهم .
- الله يحفظك.
- تعال عمو .. شو اسمك .
- يابا هذا حمار بحكي .
- عادي يابا .. لا اتخاف .. هذا حمار ودود وطيب .. هذا الزمن خلى ( الحجر ) يحكي .. اركب يابا لا تستغرب .
- تعال عمي لا تخاف .. اركب انت واخواتك .. بعيني الله .. الحلو بالموضوع انو اوزانكم قليله .. اركب عمي اركب .
- اسمع يا حمار .. خذلي اياهم هيك مشوار صغير وشممهم هوا .. يعني برضو بحركة ربع دينار .. لعل وعسى انهم يطلعوا بحبوا تعلم الفروسيه .
- حاضر يا سيدي ... انت تؤمر ... انت باين عليك زلمه طيب .
- شكرا .. شكرا .. يلا .. اتوكل على الله .
- ابوكم طيب يا اولاد ... ديرو بالكم عليه .
- طيب ... ماشي ... بس اطلع قدامك لتهورنا يا زلمه .. اول مره بنشوف حمار بحكي .
- عادي يا عمي .. لا تستغربوا ... اي انتو البشر خليتو لحمار يحكي ويحمل موبايل كمان .
- ممكن أسألك سؤال عمو .
- أسالو يا عمي ...أسألوا .. انتو زي ولادي .. اعتبروني بمقام والدكم .
- تسلم الله يحييك .. انت ليش بتخلي الناس تركب على ظهرك ؟.. انت ليش ما الك شخصيه .
- اسمعوا ده .. وبطلوا ده .. يا ابني ربنا خلقني للمهمه هاي .. هاي وظيفتي ومهمتي بالحياه .
- طيب انا ابوي مرات بالبيت بلعبنا ( حمار ) وبركبنا على ظهروا .. شو تفسيرها هاي ؟.
- والله هاي اجتهاد شخصي منو .. تطوع ... بحاول انو يقلد غيروا من باب انو يفرحكم ويلعبكم لا اقل ولا اكثر .
- انت ما بتتضايق واحد يقلدك مثلا .
- لا عادي يا عمي .. المهم ما يقرب على المتنزهات واحنا معشر الحمير بخير. خليني ارجعكم لأبوكم بعدنا كثير .... وبلاش صاحبي يزعل مني كمان ..... وهي وصلناكم ... استلم ولادك يا عمي . بدكم اشي ثاني .
- لا يا عمي يخلف عليك .
- اذا عزت اشي رن علي بس .. وهي رقم تلفوني .. لا تتردد .. والله بزعل منك .. احنا اخوان .. فرصه سعيده .
- وأنا اسعد .. شكرا للطفك سيد حمار.

............... - وهاي اجرتك يا استاذ .. شكرا الك ولحمارك ... دير بالك عليه .. ترى حمارك بحكي .
- بعرف ... يخلف عليكم ... السلام عليكم .
- وعليكم السلام.
ملاحظه : حاولت مرارا ان اتصل بالحمار ولكنه لم يجيب .... كنت اريد منه ان يجد لي عمل اضافي يعيني على تحمل اعباء الحياه .
والسلام عليكم
برهان جازيه
Burhan_jazi@yahoo.com