مش معقول هيك، كل ما واحد طلع على عماره بدّي أجمع مجلس الوزراء؟! ما عنا شغل غيركم؟!
- سيدي دولة الرئيس، ولكن هذا مؤشر خطير، ويجب أن تتنبّه الحكومة له. لما خمس شباب يحاولوا الانتحار لأنهم عاطلين عن العمل هذا أمر خطير! دولتك اعتبره نداء استغاثه من هؤلاء الشباب، بدهم شغل!
- يا ريت لو يبطلوا تدخين قبل ما يطالبوا بشغل، بعدين شعب بدو مناصب، تفضل جيبهم أشغلهم، هل يقبل أحدهم أن يشتغل في الزراعة أو معلم مدرسة في قرية؟! بدو مكتب ويصير بيك ويقعد على قلبي تقاعد ومعلولية، شعب وظيفة، ما حد بدو ينتج، بتُصرفوا على الجاهات والأعراس ميزانية بتفتح مصانع.
- طيب سيدي تحملني بملاحظة صغيرة، يعني مين عودهم يستنوا الوظيفة؟! الدولة بتوظف 40 % من الأيدي العاملة وتدفع تقريبا ثلثي ميزانيتها رواتب؟ غيروا بِنغَيِّر.
- اسمع أستاذ بديش فلسفة، وين أشغلهم يعني، لا في مي ولا في بترول، اشكروا الله هينا بنشحد ليل نهار لندفع رواتب، حدودي مسكره عالجالين، وعندي لاجئين، ومساعدات دولية صرفولنا إياها حكي! من وين أجيب أنا؟!
- بس دولتك، يعني لو وقفنا الفساد...
- اسمع أستاذ، خلصني من هالأسطوانة، كل الفاسدين في السجن أو ملاحقين قانوناً. شو بدك أعمل؟! كل ما دق الكوز بالجرة بتقلّي فساد، ومين اللي يفسد، مين اللي برشي وبقدم رشوات، مش حضرات المواطنين الكرام؟! وقفوا معنا بمحاربة الفساد بدل ما تظلوا تحكوا فيه.
- دولتك مفروض الحكومة عندها برنامج اقتصادي يواجه حالة الطوارئ التي نعيشها. أنا معك، ظروفنا صعبة، لهذا يجب أن نعمل بشكل مختلف، يجب أن نتدخل لنزع فتيل الأزمة.
- اسمع يا أستاذ، ممكن تدلني عالفتيل ملعون الوالدين عشان أنزعه؟! قطاع خاص تبع بزنس، فيش ربح، بدهمش يوظفوا، تهرب ضريبي، سرقة ماء وكهرباء، الكل بشكي بدو موسرجي، والكل بدو يدرس طب. الحكومة لحالها ما بتصفق، وين المجتمع المدني تبعك، والا بس شاطرين "كاباسيتي بلدينغ" في فنادق خمس نجوم وجمعيات خيرية للعيلة؟!
- سيدي معقول دولتك؟! يوجد الطالح ويوجد الصالح، مش معقول إنو كل الحق على الشعب؟ يعني إنتوا الصراحة فشلتم في البرنامج الاقتصادي، وما في أي أفق أو خطة! التعليم بتراجع، والتعليم المهني ما زال يحبو، الضرائب هججت المستثمرين، وموظف درجة سابعة بخرب خطة خمسية!
- شوف خيو، روح أدرس درسك، الحكومة عندها خطة اقتصادية بتعمل عليها ليل نهار!
- سيدي ولكن أثر هذه الخطة لم يصل المواطن.
- اسمع جيب ماركس وآدم سميث سوا وشوف إذا حد بقدر يفهم الوضع الاقتصادي في المنطقة؛ تحولات خارج نطاق الفهم... مش ملحقين!
- طب دولتك. بفهم منك إنو لازم نغير الشعب وننقل الوطن من الإقليم المشتعل حتى تزبط؟! هذا الموجود عنا، بدها خطة طوارئ وقرارات حاسمة تعيد الاستثمار، وتساعد في تغيير سلوك المواطنين، ونحفزهم للتوجه نحو التعليم المهني و... أكمل سيدي؟
(هنا ساد صمتٌ عميق..).
*تنويه: هذا المقال من صنف أحلام محمد أبو رمان، وأي إشارة لأي شخصية واقعية فيه هي محض صدفة بحتة... مجرد صدفة جنابك!