خرب التلفزيون ..
- في امكانيه اتشوفلنا هالتلفزيون لو تكرمت
- شو مالو ؟
- الشاشه الله وكيلك لا من ثمها ولا من كمها .
وهات يا فحص وحالات انعاش لهالشاشه .. ابدا .. انها تشتغل ابدا ...
- بصراحه الشاشه راحت شطب بعوضك الله .. اذا بتحب اتركب وحده بتكلفك .. اشتري تلفزيون جديد احسلك .. او خذ واحد مستعمل .
- يا سيدي خلينا على المستعمل على قد مصرياتنا .. في عندك اشي للبيع .. تلفزيون نتواضع .
- في .. هذا التلفزيون ما في عندي غيرو ..
فرجانا اياه الزلمه واتفقنا على السعر وقلنا على بركة الله .. وروحنا ... ثاني يوم يا جماعة الخير الوان النتلفزيون مش مظبوطه .. جاي الشاشه على زراق .. قنوات الكرتون ( طبع ) اما القنوات الثانيه الالوان مختلفه .. قارنت الوان التلفزيون المستعمل مع تلفزيون لولاد لقيت في فرق شاسع .. مثلا
• المذيع لابس ( كرافه ) بتلفزيون لولاد لونها خمري ,على التلفزيون المستعمل ( اللي اشتريتو ) لونها رمادي .
• المذيعه على قناة الجزيره على تلفزيون لولاد ( محجبه ) ,على التلفزيون المستعمل ( مفرعه ) .
• قناة جرافيك الوثائقيه في فيلم عن صياد بصيد سمك على تلفزيون لولاد , على التلفزويون المستعمل بصيد ضفادع وكراكع .
• لون الملعب اخضر على تلفزيون لولاد , على التلفزيون المستعمل الشباب بلعبو على حصيره لونها فستقي .
• قناة فرانس 24 الاخباريه الزلمه على تلفزيون لولاد بحكي فرنسي بطلاقه , على التلفزيون المستعمل بحكي الاخ فرنسي مظبوط بس مش بطلاقه .
• على قناة اخباريه اردنيه على تلفزيون لولاد في لقاء مع احد المواطنين بشكي من ارتفاع الاسعار وبنتقد , على تلفزيوني المستعمل بشكر الحكومه على انخفاض الاسعار وعلى الرفاهيه اللي هو عايش فيها .
• في قناة سينما على تلفزيون لولاد البطل بقتل الشرير وبتجوز ( صفيه ) بنت الجيران , على تلفزيوني المستعمل البطل بقتل ( صفيه ) بنت الجيران وبتجوز الشرير .
• المسلسل التركي ( سلامه ) على تلفزيون لولاد بموت بمرض ارتفاع السكري بالحلقه الخامسه , على تلفزيوني بموت ( سلامه ) حادث سير دعس بالحلقه الثانيه.
• المسلسل العربي على قناة mbc1 على تلفزيون لولاد الفنان ( ابو جواد ) ما بخلفش بالمسلسل , على تلفزيوني المستعمل صار بازز عشر ولاد وبنات والمسلسل لسه ما خلص.
• على قناة العربيه على تلفزيون لولاد الازمه السوريه انحلت وروحت الناس , على تلفزيوني المستعمل الازمه السوريه اتفاقمت وضموها الى اليمن واللاجئين السورين راحو على اليمن .
• على قناة cnn على تلفزيون لولاد فلسطين رجعت , على تلفزيوني المستعمل اسرائيل احتلت الوطن العربي.
• على قناة mbc4 على تلفزيون لولاد دعاية بيبسي كولا علبة عبوة 250 ملم بنص دينار , على تلفزيوني المستعمل دعاية بيبسي كولا علبة عبوة 250 ملم بدينارين .. حتى اسعار ( السيرف ) ( الفوط ) ( سائل جلي ) كلها بتختلف .
• النشره الجويه على احد القنوات بالاردن على تلفزيون لولاد الجو مائل الى البروده وسقوط زخات من المطر , على تلفزيوني المستعمل الجو مشمس ودرجة الحراره 40 .
هذي الامور جعلتني اضرب كف على كف .. حملنا التلفزيون لعند ( الرجال ) وشرحنالو المشكله .. وقام يشحن ويبعبش بالتلفزيون ما ظبط .. اتهاوشنا وطلبت ارجعوا ما قبل ...ورحت شكيت عليه بالمخفر .. تدخل المخفر بشكل ودي لحل الاشكال .. اخذت التلفزيون اختصار للمشاكل ورضيت فيه كما هو ... وصرت ادلل عليه حتى اخلص منو وابيعو وبأدنى سعر وبعوضني الله .. لما اجا ابن حلال واقتنع فيه واشتراه .. بعد يومين جبلي التلفزيون قلي الوان تلفزيونك مش مظبوط .. بدي ارجعو ... انا بصراحة رحت عند مصلح التلفزيونات عشان يعاير الوانو ما ظبطو .. قلي مش نافع .. وكيف مش نافع يخرب بيتو بيت وانا شاريه من عندو .. انت رحت لعند الزلمه اللي انا شكيت عليه بالمخفر .. شو هالشلبكه هاي .. واختلفنا .. وراح الزلمه شكا علي بالمخفر .. دخلت المخفر عشان التلفزيون اول مره ( شاكي ) وفي المره الثانيه دخلت المخفر ( مشتكي عليه ) على نفس التلفزيون ... رايحين جايين على المخافر والتلفزيون شايلنو على كتافنا .. وحال لسان المخفر بقول شو قصة هالتلفزيون .. شو قصة هذا الزلمه اللي هو انا .. واتوقعت من المخفر يحطني انا والزلمه والتلفزيون جوا النضاره .. وممكن نشغل التلفزيون ونتفرج عليه حتى يجي يوم المحاكمه , رغم رداءة الوانو اهو بسلي لعند ما تيجي جلسة المحكمه .. بس ما حطونا بالنضاره .. تدخل المخفر للمره الثانيه وحلها ودي بينا على اعتبار اني اتنازل عن باقي المبلغ .. وافقت .. بديش مشاكل .. الله يحرق هالتلفزيون وساعة التلفزيون .. الله يلعن اللي اخترع التلفزيون شو انو ابن حرام مصفى ..
اول مره اشتريتو من الزلمه ب (60) دينار وبعتو للزلمه ب (30 ) دينار ولما اختلفنا اتفقنا على اني احسبلوا اياه ب (15 ) دينار .. اعطاني منهم (5) والعشر ليرات الباقيات اتفاجأت اليوم الثاني لما اجيت اطلبهم منو قلي بعتو ( لعامل النظافه ) اللي بمنطقتنا روح خذهم منو انا حكيتلو عنك .. رحنا على الزمه ( عامل النظافه ) ما رضي يعطيني العشر ليرات قلي الوانو مش مظبوطه .. وبدي ارجعو للزلمه اللي اشتراه منو .. واذا ما وافق راح اشكي عليه بالمخفر ...
يا حبيبي .. يا حبيبي بس .ز ايوه .. المخفرر ما راح يشتغل الا النا وللتلفزيون .. والله المره الجاي مش راح يحطونا بالنضاره والله راح يدبونا من فوق سطح المخفر ويحلقوا ورانا التلفزيون .. وبشهاده وحضور جمعية حقوق الانسان كمان. اشي بطفح الكيل.
طيب شو الحل ؟
رجعنا على الزلمه وقلتلو مش راضي يعطينا العشر ليرات صاحبك ( عامل النظافه ) بقول الوان النلفزيون مش مظبوطه .. قلي شو رأيك اتحل عني انت وتلفزيونك .. اي قرفتني بهالتلفزيون تبعك هاذ .. اقسم بالله العظيم اذا ما بتروح من وجهي هسه بروح اشكي عليك بالمخفر ..
تاني .. تاني يا بابا .
قلتلوا .. صلي على النبي .. قال هات من الاخر .. يا عمي انا خلص ما بدي التلفزيون ولا بدي مصاريه .. خلص بعوضني الله .. الخمس ليرات اللي تخذتهم منك امناح واكويسات وعال العال .. وما بدي منك ولا من عامل النظافه اشي .. مسامحكم .. اي انفرى قلبي من ورا هالتلفزيون .. كان ممكن اصير مجرم من ورا هالتلفزيون ..
وافق وانتهت المشكله ..
رحت اشتريت تلفزيون مستعمل من محل وشخص اخر .. وعلى الفحص ما شا الله عنو .. اشتريتو مستعمل ب (40 ) دينار وهيو شغال ... وما احلاه ...
بالليل امبارح ( عيلتي ) بتسألني شو صار بالمسلسل التركي ( وهيبه اتجوزها مراد ) انا ما كملت الحلقه التهيت مع لولاد .. قلتلها لا مهي ماتت بحادث سير .. ولما اتصلت مع اختها وبتحكيلها عن المسلسل بتقولها اختها ( اه اتجوزها ) ... رجعت علي ( المدام .. قالتلي انت بتضحك علي .. قلتلها خير انشا الله شو في .. قالتلي بقولك شو صار بالمسلسل بتقولي ( وهيبه ماتت ) .. واختي مهي حاضره الحلقه وبتقولي لا اتجوزت وسافرت شهر عسل كمان ..
يا حبيبي .. هيك قلتلك .. اه .
قمت بكل هدوء .. لبست ( الشبشب) وحطيت الخلوي بجيبتي .. وفتحت الشباك .. وقرأـ الفاتحه .. وسميت .. وبكل هدوء اعصاب ومحبه وقناعه ( رميت التلفزيون ) من الطابق الثالث على راس جاري ( الغلس ) اللي تحتي ... هيك ضربنا عصفورين بحجر.

ملاحظه : اقلب القناه.
والسلام عليكم
Burhan_jazi@yahoo.com