حتى تصبح موظف مرموق ومرضي عنك , فلا بد ان تكون ذنب , لأحد ما وكل ما ارتفع شأن هذا ال ( احد ما ) لا بد ان يسحبك معه وهو طالع لفوق ,
لأنك مربوط بجزء منه وهو ما يقدر يستغني عن بعض اجزاءه , لذا تبقى معلّق فيه وين ما راح ودايما ماشي خلفه , ببساطه ما يطلعلك تكون قدامه او جنبه لأن الذنب مكانه ورا …
وهنالك العديد من المواصفات التي تجعل من شخصا ما على الهامش , ( ذنب ما ) يشار له بالبنان ومش مهم اي اصبع , السبابه , الابهام , الخنصر… وفي حالات كثيرة يشار له بالوسطى للتحبب.
ومن اهم هذه المواصفات ,(عد على اصابعك
• طويل البال واعصابه بارده ومرات تحسه ميت .
• مستودع اسرار وسره في بير لو نزل غوّاص ما يطلّع شي
• يخاف على مصلحة المصلحة ( وهي المصلحة الخاصة بالمسؤول اللي هوه ذنبه)
• يكثر من الابتسامه الصفرا لمن هم اقل منه , حتى يتهيألك انه ( اهبل )
* يكثر من الابتسامة الفوشي للمدير وهون تحسه فلتة زمانه , وانه ازعر , مقطع السمكه وذيلها
* يكثر من رمي الكلام لمن هم بنفس الطابق والمستوى والكلام لصالح المسؤول ’ لعلمه ان احد ما سوف يوصل كلامه للمسؤول حتى بالتالي يعلم البيك ( ان هذا الذنب يدافع عنه حاضر وغايب )
*مكتبه مليان ورق من السنة اللي راحت والاقلام هون وهناك والملفات ( على اساس ان الشب حامل على ظهره كل الشغل )
* يلاقي المسؤول بأي وقت مع الابتسامه حتى لو كانت مرته سامه بدنه على الريق
* نشيط وحيوي طول النهار وممكن يطلع الدرج ركضا وينزله زحلقة عشان يتجدد عقده بعد ما تنتهي صلاحيته
* دايما سندويشته من الدار على اساس انه ما بوكل الا من اديها والحقيقه غير هيك
* اذا صدف ودخل عليه المسؤول وهو يوكل يتشردق قائلا ( شايف اللقمه ما اتهنى فيها الا معك ياسيدي )
*كل كلام المسؤول صح , كل قرارات المسؤول صح , يزبط له الربطه , يجيب له ميه يشرب , يفقده بأي شي من الدار على اساس انه يفكر فيه حتى وهو مع ام العيال , يرضى بظلم المسؤول له , وممكن بالكلام الجارح , او اي شي اخر …. ليقينه ان سيده رح ينصفه ( بعدين )
*طاعة عمياء , مستعد يوكل وجبه ثانيه اذا طلب المدير منه حتى لو شبعان ويشرب ميه مرة ثانية وهو مش عطشان
* يعني كيف ما قلبته شمال يمين فوق تحت رح تلقاه شقفة وحده تطّلع صوت واحد هو اسم المدير يعني ( طبل ) بس صوت نشاز.
*وعلى اساس انه من الصف الثاني , لما يحب يوصل تعليمات او اوامر ,خذ هالصوت الناعم والسلس بس ما يضل الا يبوس على راس الموظف , اما اذا الموظف طلب منه شي , تعال وشوف الشخص الجديد واسمع الصوت اللي مثل الرعد , طبعا وحقيقة الامر اقل موظف يعرف اكثر منه بس الموظف بدون ذنب وهو معه ذنب الماني مش مستعمل
****يبهّر كل شي للمسؤول ويكثر من التوابل الهندية واذا وقع المسؤول بالخطأ من ورا افكاره , (ينقلب حية تبن ) يدفع المسؤول على موظفيه ويدفع الموظفين على المسؤول وهو على الحالتين كسبان اذا , الامور انتهت لصالح المدير هو معه ونصحه واذا العكس يكون خلص منه لأنه قرّفه حياته من زمان وما صدّق ومديره يقع حتى يزّبط قعدته على الكرسي ويتنفس الصعداء.............
طبعا هذا الكلام ما ينطبق على حدا بالبلد لا في القطاع العام او القطاع الخاص , بل على العكس تماما فعلى مكتب اي مدير ’, يوجد مقص عند المثقب والمكبس , الهدف من وجوده ان المسؤول اذا شاف او حس انه فيه حدا له ذنب , فعمليا ,) لأن المسؤولين غير في بلدنا (, فأنه عند ما يدخل ابو ذنيبة , فأنه يتناول المقص ويخلي صاحبنا يدير حاله , عشان يقص له ذنبه , وبس يطلع من المكتب يوصي السكرتيره انها تعمله اللازم , بالكاوي اللي عندها , فتقوم السكرتيرة ( بكي ) ابو ذنيبة على قفاه خوفا منها على المصلحة العامة .
وتنصحه بأستعمال اللأسافين بدل الذنب , لأن مفعول الاسفين اقوى , ويؤتي نتائجه فورا ........