خاص - كتب الناشط الطلابي وطالب الماجستير في الجامعة الهاشمية ابراهيم عبيدات منشورا على صفحته الرسمية شكل خلاله استطلاعا يمكن قياس حجم الرضا على خدمة النقل الخاصة بالطلاب ، سيما وأن هيئة تنظيم قطاع النقل عمدت مؤخرا على اجراء تحديثات رأتها من وجهة نظرها تخدم الطلاب وتيسر عليهم، فماذا قال الطلاب..

"أخبار البلد" رصدت ردود العديد من الطلبة والمتفاعلين والتي جاءت في أغلبها مخيبة للآمال ورافضة للقرارات التي اتخذتها إدارة الهيئة.. إحدى الطالبات (لين) قالت وبصراحة تامة "مازادولنا اشي بالعكس اخذوا منا، الوضع من سيء لأسوأ، كان المفروض على اقل واجب يرجعولنا خدمة تطابق القديمة بالجودة ولو اجينا للحق المفروض افضل لكن هما اخذوا منا الجيد واعطونا شيء لا توجد كلمات تصف مدى فظاعته ، عسروا الامور بدل مايتركوها مثل ماهي.

وجاء في تعليق لـ ابراهيم مستفسرا: اي تغييرات؟ اذا قصدك ع باصات مجمع الشمال مثل مهو واضح خدمة رديئة رجعتنا ١٠٠ سنة لورا ، واذا قصدك ع مجمع رغدان الباص بركب فيه فوق ١٠٠ شخص فوق بعض والباص بقرف وسخ الواحد بقرف يقعد ع المقاعد الي فيه.

تعليق أخر لـ راما تقول فيه :للامانة سيئه جدا انا حتى اخر فتره بطلت اروح من مجمع الشمال نهائي من ناحيه اسلوبهم فاسلوبهم سيء لا بيحترموا تسليم ولا بيحترموا موعد امتحان، عنده استعداد يخليك في الباص ساعة عشان راكب ولو تحرك قبل بحكيلك ادفع مكان الراكب اللي ما دخل، انا كطالبه عماره بدي ادفع ما لا يقل عن كرسيين غير الكرسي رح افعد عليه عشان مشروع لانه ما في خدمه انه يكون في صندوق تحت الباص زي ما كان في اللي قبل فالوضع للامانه ماساوي بالنسبه الي

مره بحكيله انه لو سمحت تحرك عندي امتحان بحكيلي شو اسويلك واحنا كان النا 40 دقيقه في الباص

مع مجمع رغدان فانا اتحفظ على الرد اشي يعني بيخزي الحمد لله من يوم يومه.

أما نانسي فعلقت : فقط رضينا بالأمر الواقع . لعدم توفر خدمات وحلول آخرى. منتظرين ومتأملين بإيجاد خيارات أفضل .

وكان لـ اية رد تقول فيه ": إن شاء الله بتجربوا مشان تقيموا بنفسكم (الي يحكوا انه ممتتااززز الوضع هييكك احسننن، الي لغوا الباصات الجودتها ممتازة بالكوستر

التقييم بالتجربة افضل

أما ارين فعلقت برسالة طويلة قالت فيها : كوسترات مجمع الشمال باجي فيها عالجامعة مش سيئة كتير و مش دايما بتكون سرعة السائق كبيرة يعني أوقات و أوقات بالنسبة للترويحة فكنت اروح بكوسترات صويلح يجوز الصراحة كان عددهم جدا قليل، كثير كنت اجي و الاقي فش باص فنستنى يمكن نص ساعة او اكثر و احنا واقفين لحتى يجي باص و الواحد كان مداوم و تعبان اصلا و عليه امتحانات و دراسة

او اذا كان في باص بضطر استنى ساعة او اكثر جواته لحتى يطلع و يعبي كامل الاشي كثير سيء و جد بأثر علينا كتير

فبالاخر صرت أدور على أي مواصلات تانية و إن كانت تكلفتها أكثر بس عشان أحاول أوصل أسرع و للأمانة لهلأ ما لقيت زي خدمة زمان

وقالت سوسن : رح اذكر شيء واحد من قائمة تطول

اقلها كنا نركب زمان بهندام نظيف، بالباصات الجديدة اكثر من مرة أروح البيت انتبه انه ملابسي وسخة لون اسود.

لو مرة ممكن اقول من الجامعة، بس مش مرة وحدة وانا مش اول فصل الي بالجامعة بعرف نظافة جامعتنا

الموضوع صار اسوأ ما صار احسن

أما جود فقالت : باصات حكايا والباص السريع صراحة كثير مريح المواصلات عن طريقهم

كوستار مجمع الشمال بخزي

هذه بعض التعليقات والتفاعلات نضعها أمام هيئة تنظيم قطاع النقل بداية علّها تجد حلولا أفضل أو ترى أثر قراراتها الأخيرة وتعيد دراستها، كما نضعها أمام الرأي العام والمسؤولين، ويستطيع أي متصفح للفيسبوك الاطلاع عليها ورؤية مدى السخط الذي أظهرتها عينة واحدة لديها تجارب ، استطاعت التعبير عن رأيها بجرأة ، فهل الإدارة الحالية لهيئة النقل والقائمين على قطاع النقل يعملون بما تتطلبه رؤية التحديث الاقتصادي وهل يقبل دولة رئيس الوزراء حسان بنسبة التقييم (صفر من عشرة) والتي افردتها طالبة تعقيبا على المنشور؟