اخبار البلد-

أعلن رئيس الوزراء الدكتور عمر الرزاز ليلة أمس الاثنين عن أولويّات عمل الحكومة للعامين المقبلين 2019 – 2020
ومن ضمنها أن
-الأولويّات تهدف لتحسين حياة الاردنيين وترتكز على 3 محاور وجه لها خطاب العرش : دولة التكافل، دولة القانون، دولة الانتاج.
– أولويات عمل الحكومة التنفيذ لا الوعود وضمن برنامج زمني ومؤشرات اداء قابلة للقياس.
– توفير 30 ألف فرصة عمل إضافية للأردنيين.
– اطلاق برنامج "خدمة وطن” يحاكي خدمة العلم يستهدف تخريج 20 ألف شاب وشابة مسلحين بقيم الجدية ومهارات العمل.
– شمول 80% من المواطنين بالتأمين الصحي ومتسوق خفي لضمان جودة الخدمة الصحية.
– رفع نسبة التحاق الاطفال برياض الاطفال الى 70% وانشاء 120 مدرسة جديدة.
– ربط وسائط النقل العام بنظام تتبع الكتروني وضمن مواعيد محددة لوصول وانطلاق الحافلات.

 

ردود الأردنيين وبعد انتشار ما جاء في كلمة الرئيس ، كانت عبارة عن سخرية سوداء ، وعدم قناعة او تصديق لما تحدث به الرزاز ، مع الكثير من عدم الثقة والقناعة بتصريحاته ، إضافة الى فقدان الأمل بأي تغيير نحو الأفضل ، حيث اعتبروا التصريحات من ضرب الأحلام و كلاما للاستهلاك الشعبي لا يسمن ولا يغني من جوع .

سواليف رصدت بعض ردود الأردنيين في مواقع التواصل الاجتماعي :

**اللي بينزل عالسوق بيعرف انه بكل المجالات الاوضاع مترديه فش حل غير انه يا السلع بترخص يا اما الرواتب تزيد عالاقل بشكل طردي .
بس لا هاي صارت ولا هاي صارت .
وحضرتك طالع تحكينا عن الفرص والاستثمار وووو سيدي فش اشي لمسناه
وبالمناسبه الرشوه والفساد والواسطات لسا بينخر بعظم الوطن . بصراحه وا اسفاه

** طريقة عمل السيرلاك
1-ضع السيرلاك بصحن
2-حط مي سخنة
3-كل بمعلقة صغيرة
4-لا تجلي الصحن بلاش تصرف مي والحكومة تمسكك

**لا استطيع ان اصدق كلام يخلو من المصداقيه كلام فارغ

**من اول مااجت هاي الحكومه هلت علينا المصايب

**كالعاده صف حكي وعلى ورق ومن غير تفعيل وتنفيذ على ارض الواقع

**حسسني إنه نازل على الانتخابات

**الرزاز فقد مصداقيته

**اكبر مقلب بحياتنا !

**كمان سنتين على هالاوضاع بنكون بالعالم الاخر

**بتضحكوا على الشعب وبترفعوا ضرائب بس

**وقعتوها وقعدتوا على تلها.

**خرباااااانه

** المكتوب مبين من عنوانه زهقنا كذب ودجل

**والله العمر راح وعود بوعد مضل شي نندم عليه

**والله لنكيف ، شكلو الرزاز بحكي عن المانيا

**عبارة عن تخذير فقط

**كلام غير قابل لتنفيذ

**انا احترمك معاليك وارفع لك القبعه بصراحه انتا اول رئيس وزراء بتضحك علينا وانت مبتسم مش زي الي قبلك كانو يحكو بدنا انشلح المواطن ومعصبين وشكرا جزيلا على الاخراج الجميل ولكل من ساهم بهذا العمل الفني

** وفر فرص العمل بالاول و ارفع الأجور من هون ل٢٠٢٠ و بعدها حط قانون الضريبة بصير الحكي منطقي وقابل للتصديق
أما هيك بطلنا نعرف نصدق اشي برضه، الرواتب للعاملين الي بشتغلو ما بتعيشه الا يروح ع شغله و يرجع، احنا وصلنا لمرحلة انو نكره البلد، وهاد والله حرام و ظلم

** كل الشكر لمعاليك فعلاً انت مش زي غيرك وفعلا شكرًا شكرًا من كل قلبي الك انت اول رئيس وزراء عندو تويتر وأول رئيس وزراء برد على الفيس بوك وأول رئيس وزراء بجيبنا بحوض نعنع بس وهو لطيف ومبتسم مش زي الي قبلك كشرررين والعياذ بالله
انا بنسبة للحكي الي حكيتو ما راح يفرق مع اَي واحد أصلاً ٩٠٪؜ مش فاهمين شو حكيت زي ما بقلولها بالعامية لاعت معدتنا من هيك سوالف دولتك

**ذكرني بأيام الجامعه لمه كنّا نعمل مشروع تخرج
كنّا نلبس زيه و نحكي زيه و نسفط الحكي زيه وبس نتخرج ننسا شو كنّا حاكين و شو هو اصلا المشروع و نشتغل بشي ما اله دخل بشهادتنا
لا يصلح العطار ما افسده الدهر
والخل اخو الخردل
وقد اسمعت ان ناديت حيّا لكن لا حياه تنادي

** وين المشكله لو تعمل وتبلوووور رؤيتك 2019- 2020 وبعدين خذ ضريبه بنصدق كلامك أما هيك اسمحلي اقلك
إني جذاب اذا بصدق حرف

**ذكرتوني بقصة الذيب والغنمات
النسور وصدقناه

والملقي وصدقناه
بس والله يا دولتك ما ضل فيها صدق ولا صبر ولا نفس واذا صمدنا من هون لل ٢٠٢٠ بوعدك اني اصدقك بس اوعدني اذا انسجنت من ورا الذمم الماليه والوضع الاقتصادي السيء والمسؤوليات الي عكتافنا تتكفلني وطلعني من السجن

 

**يزم فش رواتب في شغل بس فش رواتب قطاع المواصلات مترهل المواصلات مش موجوده بكلً الأماكن يعني راتبك ٣٠٠ بروحً مواصلات وين التحفيز في الموضوع الحدً الأدنى للفلبيني ٢٨٠ ومأمن بسكن وكل شي وللاردني ٢٢٠ وين يروح فيهم يا دوب أجار بيت سيبنا من اللتً والعجن وإصلاح وابصر شو زيدوً هالرواتبً خلي هالشباب تنتعش وتنتج ويصير الها نفس تشتغل غير هيك كلوا ضراط ع البلاط ..

**امنيات
فهل تتحقق
بدنا نبني بنية تحتية تتفوق على العالم وشبكات طرق تربط الشرق بالغرب
وجسر جوي لجميع دول العالم وجسر ترانزيت تجاري يقود دفة الاقتصاد
ومستشفيات عملاقة ورائدة وحديثة ومزودة بافضل الكفاءات والادوات والمعدات
وسنعمل على تطوير الايدي العاملة وبناء قوة اقتصادية في تصنيع الرقائق الالكترونية المنافسة وبناء السفن في خليج العقبة وسنافس في تجميع المركبات كل من المكسيك واسبانيا وغيرها من الدول وسنعمل على سقل العقول والمواهب وتطوير الاداء الاداري ووسائل الاتصال وسنعمل على بناء منظومة علمية اقتصادية تقنية صناعية تتفوق على شرق اسيا وتنافس اوروبا
امنيييييييييات
ومش قادرين انسيطر على اكم منهل كتل ابناء الشعب يعني بوابه مخلعة
وكم مهرب ذبحوا شباب البلد بالمخدرات
لا احتاج العلاج انفسي طالما هناك من يكسر عظمي وينهش لحمي
عالجني جسديا فيتبع البناء النفسي تلقائيا

** يبدو دارس عند السيسي..عموما يا ريت نعرف بشكل مفصل كيف رح يتم تنفيذ هاي الامور..بالملي..الزمن والتكلفة والالية.

** تعهداتك السابقة دولة الرئيس حول مراجعة حزمة الضرائب غير المباشرة و ضريبة المبيعات من أجل تخفيضها ؟ ليش لم يتم التطرق لها بهاي الإطلالة لدولتك ؟ هل تم نسيانها أم تم التراجع عن الوعود دولة الرئيس ؟

**دولتك ودنا اشي على أرض الواقع يلمسو المواطن. صراحه دولتك ما في غير فرض الضرائب ورفع الاسعار اللي حاسين فيه على ارض الواقع

**خطه بدون وجود فريق قادر على تنفيذها
لا اشك بانها خطه درست ولكني لا اجد إشارة واحده تضمن وجود فريق مؤهل لتحقيقها
تبقى نوع من انواع الأحلام

**حاليا انتو قاعدين بتخزقوا حياه المواطن.. مش بتحسنوا فيها.. وين التحسين اذا رواتب معدمه ضرائب عظيمه.. حياه سيئه.. لو يصحلنا نهاجر لنهاجر ونخلص

**انا عمري ما بنسى اول ما استلمت رئاسة الوزراء خرجت وقلت انك ستعالج الكثير من الاخطاء بعهد حكومة البولوبيف ومنها اعادة النظر برفع الجمارك على سيارات الهايبرد وضريبة وزن السيارات والتي تسببت بركود في كبير في سوق السيارات والتي بسببها توقف رفد خزينة الدوله بعوائد الجمارك وبعد دراستك ابقيت على رفع جمارك السيارات الهايبرد وياريت على هيك وبس بل و قمت بفرض ضرييه فريدة من نوعها وهي ضريبة وزن السائق ووزن العجل الاحتياطي ووزن طقم اصلاح السيارات ( الجك + مفتاح الجنط) هههههو من يومها وانا مصاب بإنفصام في الشخصيه.

**ليش هو المواطن ضل عندو طاقه
ليش هو المواطن ضل عندو طموح
ليس هو المواطن ضل عند جهد

بتمنى معاليك اول شي تعملو تحل مجلس النواب
واذا في مجلس جديد ياريت يكونو شباب
وعمر محدد 30_45لانه هاد العمر مابغفى بالمجلس
ولا بطاوشو
وياريت نشوف وزراء جداد مابحياتنا شفناهم

**سؤالي دولتك اذا انت ضليت لل 2019 صدقني مارح تسلم من الشباب والفيديو مسجل ومتركخ والكل واقفلك على دقره
لكن دولتك اذا صار وطرت زي ما طاروا يلي قببلك شو رح يصير بهلموازنه شو رح يصير بكل هلدربكة يلي بتحكي فيها

عكل حال دولة الرئيس انت والا غيرك مش فارقه كبيتوا مي بارده علينا وصلى الله وبارك
ياريتك لو سبقت شوي بخطابك بس مو مشكله بنعتبره ابرة مخدره بس وحياتك مؤقته الشباب فاض فيها الفيض ورح تلاحقك واتحاسبك كون قد الحمل والله لا يعطيه العافيه كل واحد بظلم حتى لو كنت انت….

**راح نحفظ كرامة المواطن من صحيت على هالدنيا وانا كل رئيس وزراء يقول هالكلمه لكن للأسف كل يوم يزيد عدد مرتادي الحاويات وغيرهم الكثير اللي محافظين ع كرامتهم وما طلعو من بيوتهم لكن اتوقع ما ظل كرامه ما دام كل حكومه ورى حكومه لا تنظر الا لجيبة المواطن رفع أسعار وضريبه وغيره الكثير… معقول ظل كرامه للمواطن عندكو!!!

**اعملوا لفه عمناهل البلد وأمنوا الناس ما تبلعها السيول وعائلات كامله ينخرب بيتها وفواجع بعدين حطو ضريبه زياده عهالخلق
لك الله يا وطني

**نسخ لسق من اللي قبلك
كلمات منتقاه لاستغلال العاطفة عند الشعب مع نسيان انه الشعب الاردني مثقف وفاهم شو اللي بصير
٢٠١٩ الملقي قال بنطلع من عنق الزجاجة وانت دولتك شكلك رح تقعد الشعب عليها
وعود وسنقوم وسنعمل وسندرس و س س
تي تي

**زهقتونا الحياه
صار مجرد انك تفتح عينك الصبح وتلاقي حالك عايش شيء مؤلم بطل للناس نفس بالعيشه اصلاً
يارجل والله ماراح تظبط خلص تغلبوش حالكو

** يعني استغفر الله العظيم
مش ضايل الا يحكي :سوف نبني لكل اردني بيت بالجنة !

والله شبعنا حكي معاليك .!
وبعدين اذا انت صادق تعال بعد ما تنجز قلي لقد علمنا في العامين الماضيين ..مش بدنا وبدنا .
اقلك #هاجر_يا_كتيبة

**كنا نسمع بقصة ألف ليلة وليلة
الحمد لله أصبحنا نعيشها وكل شعوب الأرض تحسدنا الرقيا الشرعية مطلوبة لحماية الوطن والمواطن من الحسد إلحقنا يا شيخ المشايخ
يا عمي رجعولنا مطيع وخله على كيفه يفيع لنرد عيون الحساد عن نعيمنا ونوهمهم إنه عنا شوية فساد
ترى العين حق وأسئلوا القبر!!!

**الراجل ده بيتكلم كلام زي الفل
نفسي افهم الحكومات شو بتتعاطى جد يارجل احنا من كثر ما انفلمنا من الحكومات خلص تمسحنا ببشرك يا بيبي احنا تمسحنا عههههههههه يعني عادي سيبك من بدنا انحافظ ع كرامت الفقير لانو بطل عند الفقير اشي يتحافظ علية لانو اصلا عطوفتك يا بيبي بطل اسمو فقير الله يخليلنا ياكو صار اسمو معدوم حاليا وعشان انتو ما تحسسو بآلام الموت ساعدتو بالقتل البطيء عن طريق رفع ضغطو يييي قصدي الاسعار وهبوط السكر عفوا قصدي هبوط الدخل يارجل حل عنا قرفتونا سنحكو انتو والي قبلكو كلكو شبه بعض اتشاطرو عالي نهبو البلد وخلعو والله ما انتو ماينين ع حدا بس بتتشطرو عالمواطن الغلبان اتطلع بالمراي بتعرف انو كلامي صح مع نفسك عطوفتك معاليك ياريت اتفخمو كمان من القابكو لانو قليلة عليكو هاي الالقاب

**بس اشوف اشي ملموس ساعتها بصدق كلامك يا دولة رئيس الوزراء…
اول اشي على قائمتك هو ديوان الخدمه المدنيه للتوظيف..
شو السر انو الرقم بقعد ١٥ سنه ما بتحرك وصديقي بتخرج وبتوظف ثاني يوم مع العلم نفس التخصص والعلامه والسكن..الخ
وهو بدون خبره للعلم
اميد مش فيتامين (و)
هاي وحده من الامور الملموسه

**متى ستختفي السين من طروحاتنا .. نهج لم يتغير .. هل يمكن اعفاء ملابس الاطفال من الرسوم الجمركيه ؟؟؟ بجرة قلم يمكنك فعل ذلك ؟؟؟ هل ستفعل ؟؟؟ أعتقد دولتك لا و لن و مستحيل و صعب … انا لن أصدق حكومة تستمر في إخضاع ملابس الأطفال للرسوم الجمركيه بينما تقوم بأعفاء السيارات الكلاسيكيه و الجبنه الزرقاء من الرسوم الجمركيه .. أعذرنا دولتك عقلي لا يستوعب حجم الوعود الذي تمنحنا اياها