رساله لمدير الجاج المحترم

بقلم: شفيق الدويك

الله يسعد صباحك يا خالتي يا مدير الجاج، و يبعد عنك ولاد الحرام يا رب .

إمبارح أخذني إبني معاه على عمان الغربية يا خالتي عشان نتفرج عالدكاكين لكبيرة يعني السوبرماركت، و إحنا بالطريق حكت معاي بنت حماي و قالت بدها تمر علينا قبل الظهر، و حلفت عليها تتغدى عندنا. وافقت ياخالتي مثل البرق، مهو طبيخي يا خالتي زاكي.

دخلنا أنا و إبني عالسوبرماركت نشتري جاج و شوية لحمه لأنه إبني حابب يجرّب محلات غير محلاتنا، و مش فارقه لزياده في السعر ليرتين مصاري !

أخذنا يا خالتي ثلاث جاجات و نص كيلو لحمه. قلت يا خالتي بحشي الجاجات. بس بصراحة بدي أفتّش و أفحص الجاجات بلكي مظروبات أو بايتات ، بس ما قدرت. كل الكيس الوان و كلام عن الجاج إنه أحسن جاج في العالم.

روّحنا عالدار يا خالتي و قلت لحالي: " حظري الجاجات بلاش بكره تنشغلي " .

و عينك يا مدير ما تشوف إلا النور. الله وكيلك يا خالتي وحده من الجاجات لونها أزرق ازرق و غامق مش مثل خواتها و ريحتها بعيد عنك و عن السامعين .... بديش أكمّل.

طب يا خالتي ليش ما تعمل أوامر تكون لكياس شفافه عشان نعرف نفحص جاجاتنا مثل الخلق و الناس ؟