ديروا بالكم على بطنكم

بقلم: شفيق الدويك

يفظح حريشك يا خالتي شو بالك طــــويل عليّ ... و الله خايفه تترفش ببطني !

شو السيرة يا خالتي؟ ما حدا مستحمل إلثاني هاي الأيام، و كل الناس بدها تترفش ببطن بعظها البعظ !

إبن إبني راح يعمل معاملة، إلموظف حكاله:  "مش فاظيلك هسه، مش شايفني بحكي تلفون. إرجع بكره المدير مش موجود".

ابني حكى لإبنه: شو هالوقاحة، كان لازم تترفش ببطنه.

بياع الخظار نفس لحكاية، علشان حكاله الولد: ليش ما معاك فراطة، يعني فكة مصاري ؟، كان جوابه: إستهدي بالله بلاش أترفش ببطنك !

سمعت سواق الباص بيستعمل نفس الكلام مع الكونترول قبل اسبوعين علشان إختلف معاه .

وإبني لما رجع من الشغل، شاف اولاد الجيران عند بوابة الدار حكالهم: "إذا بتعيدوها و بتتجمّعوا قدام دارنا بترفش ببطكنكم" .

و بعظ الطلاب بيتمنوا يترفّشوا ببطن بعظ لمعلمين، و بعظ لمعلمين بهددوا الطلاب إنهم يترفشوا ببطنهم.

و معلمين الطوبار بدهم يترفشوا ببطون العمال، و العمال بدهم يترفشوا ببطن بياع الهريسة و بياع الهريسة ناوي يترفش ببطن الفران.

معظم الناس نفسها تترفش ببطون بعظ السكرتيرات يا خالتي لأنهن مش فاظيات للمراجعين، بدهن يرتبوا لعزايمهن، شايفات حالهن و بيحكوا من طرف شلاطيفهن، و بعظ السكرتيرات سمعتهن حابين يترفشوا ببطون لمراجعين و البياعين و المدرا.

جارنا الدكتور ابو صابر خايف لمراجعين يترفشوا ببطنه.

بالك يا خالتي لو حدا إترفش ببطني لأني كثيرة حكي و لساني ما بيدخل ثمي و طلعت روحي ، بتروح لحكاية بفنجان قهوة ؟؟؟؟؟!!!!

الله يقطع شركم يا ناس. كل واحد يدير باله على بطنه و الله يستر يا خالتي.