مسابقة ملكة جمال الأردن
فجأة ..ودون إحم ولا تستور ..ولا حتى رسالة على الفيس أو الواتس
..يظهر علينا إعلان نتيجة «ملكة جمال الأردن « ..ويبدأ الأردنيون على مواقع
التواصل الاجتماعي (نقرزة و تهكماً و سخرية ) ..ولا أحد يستطيع إيقافهم ..لأن
المسابقة (سريّة) هههههههههه..ولا نعرف عنها إلا وقت النتيجة ..وين صارت ؟ و مين
عملها ..؟ وما هي أسسها ..؟ كلها أسئلة و غيرها لا مجيب لها ..والأدهى والأمر أن
الفائزة دائماً ليست جميلة ..مع أن الأردن تضجّ فعلاً بالجميلات إللي (يفكن عن حبل
المشنقة و إللي يهبل هبل) ..!
على نفس المنوال ..أفكر بأن أعمل مسابقة (سريّة) لملك جمال الأردن ..و
أعلن نفسي فائزا وحيداً فيها ..وسأصفق لي .. وسأبوسني ..وسأقنعني بأنني (أهبل هبل
) و أن (النسوان سيكونن حواليّ حبطرش ) وأنهن سيصابن بالجنون من ورائي
..وسأقضي على أسطورة ( مهند التركي) ..ولن ألتفت لأي ناقد لأنه حاقد ..ولن أردّ
على أي واحد يحكيلي : اعقل ...لأن هذا زمن اللاعقل ..!!
وأنتم كذلك ..افعلوا مثلي ..اعملوا مسابقاتكم السرية ..وفوزوا فيها
..مش شرط مسابقات جمال ..مسابقة أي شيء لأي شيء ..لأنها طعّة و قايمة وما حدا
سيسألكم ..الأردن البلد الوحيدة التي فيها ذلك ...برطعوا و فوزوا و توجّوا أنفسكم
بأنفسكم ..
صدقوني ..نفسي أفهم شو اللي بصير ..وليش ما حدا قادر يوقف بوجه هيك
أعمال تخرج علينا فجأة ..هذا تاريخ الأردن يا جماعة ..لماذا تعبثون به وأمامنا
..؟؟